मुबंई - भाजप आणि शिवसेना सध्या निवडणूक प्रचारात मोठ्या प्रमाणात पैसा खर्च करेल. काँग्रेस पक्षाकडे इतका पैसा खर्च करणे अशक्य आहे. तरी कार्यकर्त्यांनी नाराज न होता, उमेदवाराला विजयी करण्यासाठी पूर्ण प्रयत्न करावे, असे आवाहन संजय निरुपम यांनी केले आहे. दक्षिण-मध्य मुंबई मतदारसंघातील आघाडीचे संयुक्त उमेदवार एकनाथ गायकवाड यांच्या निवडणूक प्रचारार्थ प्रथमच जिल्हा कार्यकर्ता मेळावा चेंबूर येथे झाला. यावेळी संजय निरुपम बोलत होते.
साडेचार वर्षात भाजप आणि शिवसेनेने भ्रष्टाचार करून पैसा जमवला आहे. निवडणूकीच्या प्रचारात ते पैशाचा पाऊस पाडतील, असे भाकित संजय निरुपम यांनी केले. पुढे बोलताना मिश्किलपणे ते म्हणाले, की एकनाथ गायकवाड यांच्याकडे थोडा फार पैसा आहे. तो आपण खर्च करू. यावेळी गायकवाड यांच्या चेहऱ्यावरील हावभाव गंभीर झाल्याचे दिसले. भाजप आणि शिवसेनासारखा पैसा आमच्याकडून मिळाला नाही, तरी कार्यकर्त्यांनी नाराज न होता उमेदवाराला सहकार्य करावे, असे निरुपम म्हणाले. कट्टर काँग्रेस कार्यकर्ता म्हणून सर्वांनी काम करून एकनाथ गायकवाड यांना निवडून आणावे. आपले हे सर्वांचेच कर्तव्य आहे, असे ते म्हणाले.
