मुंबई - चीनने पेच टाकला आहे व आम्ही हिंदुस्थान विरुद्ध पाकिस्तानच्या कैचीत अडकून पडलो आहोत. काश्मीर खोऱ्यात शांतता नांदायला तयार नाही. सीमेवर धुमशान व आतमध्ये कमालीची खदखद आहे. काश्मीरातील विषय गंभीर आहे. मात्र, चीनच्या आक्रमकतेकडे आणि घुसखोरीकडे दुर्लक्ष करून चालणार नाही. ज्या जोशात पाकिस्तानला दम भरला जातो, त्याच पद्धतीने चीनला दम देण्यापेक्षा कृतीची गरज आहे, असे आजच्या सामनातून केंद्र सरकारला सांगण्यात आले आहे. तसेच केंद्र सरकारच्या पाकिस्तान आणि चीनच्या बाबतीत वेगवेगळ्या भुमिकांवरून ताशेरे ओढण्यात आले आहेत.
वाटल्यास श्रीनगर, पाकव्याप्त काश्मीरवर भगवा फडकवण्यासाठी भाजपच्या पुढाऱ्यांची नियुक्ती करा, अशी खोचक टीका करत चिनी सैन्याला कधी रोखणार? असा सवाल उपस्थित करण्यात आला आहे. डोकलाममध्ये चिनी सैन्य घुसले. हिमाचल, अरुणाचल, उत्तराखंडच्या सीमेवर ते घुसण्याच्या तयारीत आहे आणि लडाखमध्ये ते ठाण मांडून बसले आहे. त्याची कुणाला चिंता आहे का? असा सवाल सामनातून उपस्थित करण्यात आला आहे.
जमिनीवर ताबा घेतल्यानंतर वाटाघाटी करणं आश्चर्यकारक
चिनी सैन्य घुसखोरी करून भारताच्या हद्दीत घुसले मात्र, आता ते माघारी जायला तयार नाही. यासंदर्भात दोन्ही देशातील सैन्य आणि अधिकाऱ्यांमध्ये चर्चा आणि वाटाघाटी सुरू आहे. त्यांनी आपल्या जमिनीवर ताबा घेतल्यानंतरही आपण चर्चा करणं हे आश्चर्चकारक आहे, असेही सामनात म्हटले आहे. आपली जमीन असूनही पंतप्रधान, संरक्षणमंत्री किंवा भाजप पुढाऱ्यांनी चिनी सैन्याला दम भरल्याचे दिसत नाही, अशी टीकाही केंद्र सरकारवर करण्यात आली आहे. हे सर्व केवळ पाकिस्तानसाठीच असावं, अशी कोपरखळीदेखील सामनात लगावण्यात आली आहे.
भूतानमध्ये चिनी सैन्यात गाव घेतले ताब्यात
चिनी सैन्याने भूतानमधील डोकलामजवळचे एक गाव ताब्यात घेतल्याचे सामनात सांगण्यात आले आहे. चिनी सैन्य डोकालाम पार करून गावात घुसले आहे. वारंवार भारतीय सैन्यासोबत झटापट झाली आहे. भूतानचे रक्षण करण्याची जबाबदारी भारतीय सैन्याची आहे. भूतान अस्थिर होणं म्हणजे आपल्या देशाच्या सीमांना भगदाड पाडणे असल्याचेही सामनात म्हटले आहे. चीनने आपल्या सीमेत प्रवेश केल्यानंतर दिल्लीश्वर डोळे झाकून भारत-पाकिस्तानच्या झांज-चिपळ्या वाजवत असल्याची टीका सामनातून पंतप्रधान मोदींवर करण्यात आली आहे.
पाकिस्तानचे बंकर पेटवले मात्र, आपले सैनिक हुतात्मा
भारताने पाकिस्तानच्या हद्दीत कारवाई करून बंकर्स पेटवले मात्र, आपले जवान मारले गेले त्यांचे काय. तसेच महाराष्ट्रातील दोन जवानांच्या शवपेट्या आल्या तेव्हा भाजप पुढारी मुंबईत छठपुजेची आणि मंदिरे उघडण्याची मागणी करत होते, अशी खरमरीत टीका सामनातून करण्यात आली आहे.
मगच मुंबईवरील तेजस्वी भगव्याशी नाद करा
आधी श्रीनगरच्या लाल चौकात तिरंगा फडकवा. त्यानंतर लडाखमध्ये चिनने रेड आर्मीचे फडकवलेले निशान उतरवून दाखवा आणि मग मगच मुंबईवरील तेजस्वी भगव्याशी नाद करा, असे आव्हान शिवसेनेने सामनातून भाजपाला दिले आहे.
हेही वाचा - 'शिवसेनेचं हिंदूत्व अन् भगवा भेसळयुक्त, सावरकरांचा अपमान करणाऱ्यांबरोबर सत्तेत'
