मुंबई - राष्ट्रवादी काँग्रेसचे अध्यक्ष शरद पवार यांची तिसरी पिढी राजकारणात सक्रिय होताना दिसत आहे. लोकसभा निवडणुकीत माजी उपमुख्यमंत्री अजित पवार यांचे पुत्र पार्थ पवार यांनी नशीब आजमावले होते. मात्र, त्यांना अपयश आले. आता येणाऱ्या विधानसभा निवडणुकीत विद्यमान जिल्हा परिषद सदस्य आणि शरद पवार यांचे नातू रोहित पवार हे निवडणुकीच्या रणांगणात उतरणार आहेत. ते अहमदनगर जिल्ह्यातील कर्जत-जामखेड विधानसभा मतदारसंघातून निवडणूक लढवण्याच्या तयारीत आहेत. याबाबत ईटीव्ही भारतने त्यांच्याशी संवाद साधला. जाणून घेऊया रोहित पवारांना का येथून निवडणूक लढवयाचीयं...
कर्जत-जामखेड मतदारसंघातून रोहित पवार यांच्यापुढे अहमदनगरचे विद्यमान पालकमंत्री राम शिंदे यांचे आव्हान असणार आहे. मात्र, रोहित पवार यांनी या मतदारसंघात नियोजनबद्ध यंत्रणा राबवली आहे. गेल्या अनेक दिवसांपासून ते या मतदारसंघात सक्रिय असल्याचे पाहायला मिळत आहे.
काय म्हणाले रोहित पवार..
कर्जत-जामखेड मतदारसंघातून आपली उमेदवारी निश्चित मानली जातेय, तशी पक्षाकडे आपण मागणीही केली आहे काय सांगाल?
मी राष्ट्रवादी काँग्रेसच्या जिल्ह्याध्यक्षांच्या माध्यमातून उमेदवारीची मागणी केली आहे. बऱ्याच दिवसांपासून मी या मतदारसंघात काम करतोय. बऱ्याच लोकांच्या भेटी-गाठीही घेतल्या आहेत. मतदारसंघातील अनेक लोकांनी राष्ट्रवादीचे अध्यक्ष शरद पवार यांच्याकडेही माझ्या उमेदवारीची मागणी केल्याचे रोहित पवार म्हणाले.
कर्जत-जामखेड हाच मतदारसंघ का निवडला?
या मतदारसंघात काम करण्यासारखे बरेच विषय आहेत. शेतीसाठी पाणी, पिण्यासाठी पाणी हे विषय महत्वाचे आहेत. रोजगाराचा मोठा प्रश्न आहे. शिक्षणाच्या अपुऱ्या सुविधा आहेत. तसेच बससेवेच्या सुविधा अपुऱ्या आहेत. आरोग्याच्या सवुधेचा प्रश्न आहे. या सर्व गोष्टींवर काम करण्यासाठी या मतदारसंघाची निवड केली आहे.
निवडणूक लढवण्याच्या दृष्टीने आपण कशी तयारी सुरू केलीय?
लोकांशी संवाद हेच निवडणुकीच्या तयारीचे मोठे वैशिष्ट्य आहे. या मतदारसंघातील कार्यकर्त्यांना, लोकांना भेटणे, त्यांचे प्रश्न जाणून घेणे सध्या सुरू आहे.
पालकमंत्री राम शिंदेचे मोठे आव्हान आपल्यासमोर असणार आहे, काय सांगाल?
या मतदारसंघात कामाचे मोठे आव्हान आहे. माझ्या विरोधात कोण उभे राहते, त्यापेक्षा आपल्याला काय करायचे आहे, त्या गोष्टी समजून घेणे गरजेचे आहे. त्या गोष्टी ५ वर्षात आमदार म्हणून समजून घ्यायच्या आहेत.
मतदारसंघात प्रतिसाद कसा मिळत आहे?
कर्जत-जामखेड मतदारसंघात राष्ट्रवादीची ताकद चांगली आहे. लोकांचा चांगला प्रतिसाद मिळत आहे. लोकांमध्ये उत्सुकता खूप आहे. कार्यकर्ते हिच आमची ताकद आहे.
काँग्रेससोबत आघाडी करण्याबाबत काही चर्चा सुरू आहे का?
काँग्रेस आणि राष्ट्रवादी काँग्रेसची आघाडी होण्याची शक्यता आहे. पक्षाचे अध्यक्ष शरद पवार याबद्दल चर्चा करुन पुढील निर्णय घेतील.
धनगर आरक्षणाचा मुद्दा
पालकमंत्री राम शिंदे हे या मतदारसंघातून तिसऱ्यांदा निवडणूक लढवत आहेत. राम शिंदे हे धनगर समाजातले आहेत. या मतदारसंघात धनगर समाजाचे मतदार मोठ्या प्रमाणात आहेत. मात्र, आरक्षणाच्या मुद्यावरुन धनगर समाज राम शिंदेवर नाराज असल्याचे पाहायला मिळत आहे. याचा फटका शिंदेना बसू शकतो. तर जिल्ह्यात भाजपमध्ये विखेंची एंन्ट्री झाल्याने वर्चस्वाचा मुद्दा महत्वाचा ठरु शकतो. विखे शिंदेना किती मदत करतात हे पाहणेही गरजेचे आहेत. तर दिलीप गांधी गटाचाही राम शिंदेंना अंतर्गत विरोध आहे.
कोण आहेत रोहित पवार
१) रोहित पवार हे राष्ट्रवादी काँग्रेसचे अध्यक्ष शरद पवार यांचे नातू आहेत.
२) गुणवडी-शिर्सुफळ गटातून ते विद्यमान जिल्हा परिषद सदस्य आहेत.
३) बारामती अॅग्रोचे विद्यमान अध्यक्ष
४) इंडियन शुगर मिल असोसिएशनचे (इस्मा) अध्यक्ष
५) सृजणचे प्रमुख - या माध्यमातून वेगवेगळे कार्यक्रम
