मुंबई: अंधेरी पूर्व विधानसभा पोट निवडणुकीत शिवसेना उध्दव बाळासाहेब ठाकरे गटाच्या उमेदवार ऋतुजा लटके यांचा दणदणीत विजय झाला आहे. या निवडणुकीत ऋतुजा लटके यांच्या विरोधात ६ उमेदवार होते. या सर्व उमेदवारांची अमानत रक्कम ही जप्त झाली आहे. विशेष म्हणजे या निवडणुकीत भाजपचे उमेदवार मुरजी पटेल यांनी आपला उमेदवारी अर्ज मागे घेतल्याने या निवडणुकीतील रंगत संपली होती. परंतु भाजपकडून नोटा बटण दाबण्यासाठी मतदारांना पैशाचे आमिष दाखविले जात असल्याचा आरोप शिवसेना माजी मंत्री व आमदार अनिल परब यांनी केल्याने या निवडणुकीच्या निकालाबाबत सर्वत्र उत्सुकता होती. ऋतुजा लटके यांना एकूण ६६५३० मते भेटली तर त्यांच्या पाठोपाठ नोटाला १२८०६ मते भेटली आहेत.
ऋतुजा लटके यांचा दणदणीत विजय - अंधेरी पूर्व विधानसभा निवडणुकीसाठी ३ नोव्हेंबर रोजी मतदान झाले होते. या निवडणुकीत एकूण ३१.७४ टक्के मतदान होऊन एकूण ८६५७० मतदारांनी मतदान केले होते. त्याची मतमोजणी आज झाली.मतदान मोजणीच्या एकूण १९ फेऱ्या झाल्या व या सर्व फेऱ्यांमध्ये ऋतुजा लटके यांचच वर्चस्व राहिले. ऋतुजा लटके यांना या १९ फेऱ्या व टपाल मतदान या मधून एकूण ६६५३० मते भेटली. तर त्यांच्या खालोखाल नोटा (एकही उमेदवार पसंत नाही) यास १२८०६ मते भेटली. यामुळे या निवडणुकीत ऋतुजा लटके यांचा ५३७२४ मतांनी विजय झाला आहे.
सर्व उमेदवारांचे डिपॉझिट जप्त - ऋतुजा लटके यांच्या विरोधात या निवडणुकीत अजून 6 उमेदवार उभे होते. त्या सर्व ६ उमेदवारांची जमानत रक्कम जप्त झाली आहे. या 6 पैकी एकाही उमेदवाराला २ हजार मतांचा टप्पा सुद्धा गाठता आला नाही. त्यांना भेटलेली अंतिम मते खालीलप्रमाणे आहेत. बाला नाडार- १५१५, मनोज नायक- ९००, नीना खेडेकर- १५३१, फरहाना सय्यद- १०९३, मिलिंद कांबळे- ६२४, राजेश त्रिपाठी - १५७१.
ऋतुजा लटके पाठोपाठ नोटाला सर्वाधिक पसंती - या निवडणुकीत भाजपचे उमेदवार मरजी पटेल यांनी शेवटच्या क्षणी उमेदवारी अर्ज मागे घेतल्याने या निवडणुकीतील चुरस तेव्हाच संपली होती. परंतु शिवसेनेचे नेते माजी मंत्री अनिल परब यांनी नोटा हे बटण दाबण्यासाठी विरोधकांकडून प्रचार केला जात आहे. त्यासाठी नोटांचे वाटप ही केले जात असल्याचा आरोप केला होता. म्हणून या निवडणुकीच्या निकालात नोटा विषयी सर्वांना कुतूहलता होती. यंदा नोटाला १२८०६ मतदारांनी पसंती दर्शविली आहे.
