मुंबई - राज्यात कोरोना काळामध्ये सामान्य जनतेला मोठ्या प्रमाणात वीजबिले आकारण्यात आली आहेत. या वाढीव बिलांच्या विरोधात लोकांमध्ये असंतोष आहे. सर्वच पक्ष याविरोधात आंदोलन करताना दिसत आहेत. मनसेने देखील अनेक ठिकाणी तीव्र आंदोलन करत कार्यालये फोडली आहेत. याच पार्श्वभूमीवर आज अदानी इलेक्ट्रिसिटी कंपनीचे सीईओ शर्मा यांनी राज ठाकरे यांची भेट घेतली. वीजबिलांबाबत जनतेचा उद्रेक होण्याअगोदर मागण्या मान्य कराव्यात, असा इशारा राज ठाकरे यांनी दिला.
राज ठाकरे आणि अदानी कंपनीच्या सीईओमध्ये वाढीव वीजबिलासंदर्भात चर्चा झाली. कोरोनाच्या काळात अनेकांच्या नोकऱ्या गेल्या आहेत, वाईट परिस्थितीत लोक जगत आहेत, उत्पन्नाचे साधन नाही. या परिस्थितीत त्यांना ज्या प्रकारची बिले आलेली आहेत ती खूपच जास्त आहेत, असे राज ठाकरे यांनी सांगितले. लोकांमध्ये वाढीव बिलांमुळे कंपन्या बद्दल प्रचंड राग आहे. भविष्यामध्ये या कंपन्यांनी सरकारशी बोलून अथवा कोणत्याही पद्धतीने बील कमी करत दिलासा दिला नाही, तर या जनतेचा कधीही उद्रेक होऊ शकतो. यानंतर परिस्थिती हाताबाहेर जाईल ती कोणाच्याच नियंत्रणामध्ये नसेल, असा इशारा राज ठाकरे यांनी दिला आहे.
हेही वाचा-आंतरराष्ट्रीय 'क्लीन एअर फॉर ब्लू स्काईज' दिनानिमित्त जावडेकर घेणार वेबिनार...
गेले अनेक दिवस महाराष्ट्र नवनिर्माण सेनेकडून वाढीव बिलांच्या विरोधात आंदोलन केले जात आहे. काही कंपन्यांशी वेगवेगळ्या स्तरावर चर्चा केली जात आहे. परंतु, कंपन्यांनी आजपर्यंत कोणताही दिलासा दिलेला नाही. कंपन्यांचा व्यवसाय आहे हे समजू शकतो. मात्र, अशी परिस्थिती असताना जनतेला दिलासा देणे हे गरजेचे आहे. लवकरात लवकर कंपन्यांनी त्यांच्या परीने निर्णय घ्यावा. अन्यथा आम्ही लोकांसोबत आहोत, परिस्थिती हाताबाहेर गेली तर याला कोणीही जबाबदार नसेल, असे राज ठाकरे यांनी अदानी कंपनीचे सीईओ शर्मा व इतर विद्युत कंपन्यांना इशारा देत सांगितले, अशी माहिती मनसे नेते नितीन सरदेसाई यांनी दिली आहे.
