मुंबई - विधानसभा निवडणुकीच मैदान आता चांगलचं तापलं आहे. सर्वच राजकीय पक्ष जोरदार प्रचार करताना दिसत आहेत. विधानसभा निवडणुकीच्या तोंडावर काँग्रेस आणि राष्ट्रवादीच्या अनेत बड्या नेत्यांनी भाजपमध्ये प्रवेश केल्याने राज्यात भाजपची ताकद आणखी वाढली आहे. पुन्हा आम्हीच सत्तेत येऊ, असा दावा सत्ताधारी करत आहेत. तसेच यावेळी भाजपने जेष्ठ नेत्यांना डावलल्याने देवेंद्र फडणवीस हेच पुन्हा मुख्यमंत्रीपदाचे दावेदार असल्याची चर्चाही सुरु आहे. याचसंदर्भात ईटीव्ही भारतने राजकीय विश्लेषक जयदेव डोळे आणि कुमार सप्तर्षी यांच्याशी बातचीत केली आहे....
ज्या नेत्यांनी भाजप तळागाळात पोहोचवण्याचे काम केले. अशा नेत्यांना यावेळी भाजपने तिकीट नाकारले आहे. हे तिकीट नाकारण्यामागे मुख्यमंत्री देवेंद्र फडणवीस यांचा हात असल्याचेही बोलले जात आहे. एकनाथ खडसे, चंद्रशेखर बावनकुळे, विनोद तावडे, प्रकाश मेहता यांना तिकीट नाकारल्याने देवेंद्र फडणवीस यांचा मुक्यमंत्रीपदाचा मार्ग सुकर होत असल्याच्या चर्चा राजकीय वर्तुळात रंगत आहेत.
पंकजा मुंडेंसाठी नरेंद्र मोदींसह अमित शाहंची सभा
दुसरीकडे पंकजा मुंडे यांचेही पक्षातील वजन वाढताना दिसत आहे. त्यांच्यासाठी केंद्रीय गृहमंत्री अमित शाह यांनी सभा घेतली आहे. तर देशाचे पंतप्रधान नरेंद्र मोदी हेसुद्धा त्यांच्यासाठी प्रचारसभा घेणार आहेत. कालच (गुरुवारी) खासदार प्रीतम मुंडेंनी महिला मुख्यमंत्री पदासाठी पंकजा मुंडे यांच्याइतके दुसरे कोणी प्रभावी नसल्याचे म्हटले आहे. तसेच भविष्यात राज्याच्या राजकारणाची सूत्रे परळीतून हलवली जाणार असल्याचेही त्या म्हणाल्या होत्या. प्रीतम मुंडेंच्या या वक्तव्यानंतर राजकीय वर्तुळात चर्चांना उधाण आले आहे.
विशिष्ट समाजघटकाकडेच नेतृत्व - जयदेव डोळे
भाजपने विशिष्ट समाजघटकाकडेच नेतृत्व दिले आहे. कमी संख्या असणाऱ्या समाजघटकाकडे नेतृत्व सोपवल्याने त्यांच्यावर अंकुश ठेवणे सोपे जाते. त्यामुळे त्यांनी ब्राम्हण समाजाचा मुख्यमंत्री नेमला असल्याचे मत राजकीय विश्लेषक जयदेव डोळे म्हणाले.
शाह आणि मोदींचा डाव
भाजपमध्ये जेष्ठ नेत्यांना डावलण्याचा डाव हा एकटा देवेंद्र फडणवीस यांचा नसून पंतप्रधान नरेंद्र मोदी आणि गृहमंत्री अमित शाह यांचा असल्याचे जयदेव डोळे म्हणाले. ज्येष्ठ नेत्यांना डावलल्याचा भाजपला काहीही तोटा होणार नाही. कारण भाजप सध्या राष्ट्रीय मुद्यावर निवडणुका लढवत आहे.
लोकांना झुलवत ठेवण्याचा प्रकार
भाजप पंकजा मुंडेंना मुख्यमंत्रीपदावर बसवणार नाही. नरेंद्र मोदी आणि अमित शाह यांनी पंकजा मुंडे यांच्यासाठी सभा घेणे म्हणजे ते एक प्रकारचे राजकारण आहे. ओबीसी समाजघटकाच्या मतासांठी जनतेला हे नेते झुलवत ठेवत आहेत. मते मिळवण्यासाठीची ही युक्ती असल्याचे जयदेल डोळे म्हणाले.
मोदी शहांचा पाठिंबा असल्यानेच मुख्यमंत्री प्रबळ दावेदार - कुमार सप्तर्षी
नरेंद्र मोदी आणि अमित शाह यांना त्यांचा हुकुम माणणार नेता हवा आहे. मुख्यमंत्री देवेंद्र फडणवीस हे त्यांच्या मर्जीतले आहेत. मोदी आणि अमित शाह यांचा पाठिंबा असल्यानेच देवेंद्र फडणवीस हे पुन्हा मुख्यमंत्री पदाचे दावेदार असल्याची प्रतिक्रिया राजकीय विश्लेषक कुमार यांनी दिली.
३७० कलमाचा आणि महाराष्ट्राचा काय सबंध - कुमार सप्तर्षी
भाजप मूळ प्रश्न बाजूला ठेवत आहे. बेरोजगारी, महागाई, शेतकरी आत्महत्या आणि कर्जमाफी या मुद्यांना बगल देत आहे. ३७० कलमाच्या नावाखाली मते मागत असल्याचेही कुमार सप्तर्षी म्हणाले. राज्यात प्रश्न वेगळे आहेत. ३७० कलमाचा आणि महाराष्ट्राचा संबध काय असेही ते म्हणाले.
विरोधकांमध्ये ऐकी नसल्याचा भाजपला फायदा
विरोधकांमध्ये एकी नसल्याचा भाजपला मोठा फायदा झाल्याचे कुमार सप्तर्षी म्हणाले. जर सर्व विरोध एकत्र आले तर भाजपला पर्याय उपलब्ध होऊ शकतो असेही कुमार सप्तर्षी म्हणाले.
