मुंबई - बॉलिवूड अभिनेता सुशांत सिंग राजपूत याच्या आत्महत्येप्रकरणी मुंबई पोलिसांकडून तपास सुरू आहे. या तपासादरम्यान आतापर्यंत पोलिसांनी तब्बल 11 जणांचे जबाब नोंदवून घेण्यात आले आहे. पोलीस सूत्रांकडून मिळालेल्या माहितीनुसार, बॉलिवूड चित्रपट क्षेत्रातील 5 नामवंत चित्रपट निर्मिती संस्था व निर्मात्यांचे जबाब नोंदविण्यात येणार आहेत.
'त्या' 5 निर्मात्यांची होणार चौकशी
हे जबाब सुशांत सिंग राजपूत यांच्या आत्महत्येच्या संदर्भात नोंदविण्यात येणार असल्याचे सांगण्यात आले आहे. पोलिसांनी आतापर्यंत केलेल्या तपासात अभिनेता सुशांत सिंग राजपूत याने नजीकच्या काळात काही नव्या चित्रपटांचा करार केला होता. मात्र, अचानकपणे वेळे आधीच यातील काही चित्रपटांचा करार मोडण्यात आला होता. अचानक सुशांत सिंग राजपूत याच्यासोबत करण्यात आलेला करार का मोडण्यात आला, याचे कारण तपास करणाऱ्या पोलीस अधिकाऱ्यांना जाणून घ्यायचे आहे. पोलीस सूत्रांकडून मिळालेल्या माहिती नुसार, गेल्या महिन्यात सुशांत सिंग राजपूत याचे बॉलिवूडमधील काही निर्मात्यांसोबत काही कारणांवरून खटके उडाले होते. मात्र, या मागचे कारण अद्याप समोर न आल्याने त्या दिशेने पोलिसांचा तपास सुरू आहे.
सुशांतचा मोबाइल, लॅपटॉप पाठवले फॉरेन्सिक लॅबला
सुशांत सिंग राजपूत याने त्याच्या एका जवळच्या मैत्रिणीला त्याच्या मोबाइल क्रमांकावरून काही महत्वाचे मेसेज पाठवले होते. या संदर्भात संबंधित व्यक्तीची चौकशी लवकरच केली जाणार आहेत. सुशांत सिंग राजपूत याच्या घरातून पोलिसांना त्याचा मोबाइल फोन व लॅपटॉप मिळाला आहे. त्याचा पासवर्ड अनलॉक करण्यात आला असून काही प्रमाणात डिलीट करण्यात आलेला डेटा हा परत मिळविण्यासाठी मोबाइल फोन व लॅपटॉप फॉरेन्सिक लॅबकडे पाठविण्यात आला आहे.
कुठल्याही आर्थिक संकटात नव्हता सुशांत सिंग
पोलिसांना मिळालेल्या सुशांत सिंग याचे बँक खाते तपासले असता, सुशांत सिंगकडे मुबलक प्रमाणात पैसा होता. शवविच्छेदन अहवालात कुठल्याही अमली पदार्थांच्या सेवणाचा पुरावा आढळून आलेला नाही. काही दिवसांपूर्वी सुशांतसिंग हा त्याच्या वडिलांच्या संपर्कात होता, ज्यात त्याने नोव्हेंबर महिन्यात लग्न करण्यासाठी होकार कळविला होता. मात्र, त्याच्या खासगी व व्यावसायिक आयुष्याशी निगडित काही गोष्टींचा तपास पोलीस करीत आहेत.
हेही वाचा - सुशांत आत्महत्या प्रकरण: करण जोहर, सलमानसह आठ जणांविरोधात तक्रार दाखल
