मुंबई - उस्मानाबाद लोकसभा मतदारसंघातून शिवसेनेने तिकीट नाकारलेल्या रवींद्र गायकवाड यांच्या समर्थकांना आम्ही ताब्यात घेतले आणि केवळ त्यांची विचारपूस करून सोडून दिले, असा दावा आज दादर पोलीस ठाण्यामधील वरिष्ठ अधिकाऱ्यांकडून करण्यात आला आहे.
लोकसभा निवडणुकीच्या पार्श्वभूमीवर राज्यात आचारसंहिता सुरू असून त्याच आचारसंहितेच्या नियमानुसार कुठेही आचारसंहितेचा भंग होऊ नये, यामुळे आम्ही उस्मानाबाद येथून आलेल्या २२ शिवसैनिकांना दादर स्थानकावर पकडले होते. काही वेळ बसवून घेतले आणि त्यांना नंतर सोडून देण्यात आले. कोणावरही आम्ही कारवाई केली नाही, असा दावा पोलीस ठाण्याकडून करण्यात आला.
दरम्यान, उस्मानाबाद लोकसभा मतदारसंघातून शिवसेनेने रवींद्र गायकवाड यांना तिकीट का दिले नाही, म्हणून विचारणा करण्यासाठी मुंबईत पक्षप्रमुख उद्धव ठाकरे यांना भेटण्यासाठी शिवसैनिक येत होते. त्यांची वाशी, नवी मुंबई येथे गाडी अडवून काही जणांना ताब्यात घेतले होते. तर त्यातील काही शिवसैनिक मात्र, पोलिसांना चकवा देत दादरपर्यंत पोहोचले होते. त्यांची थोडीशी कुणकुण लागताच दादर पोलिसांनी सकाळी २२ जणांना ताब्यात घेतले होते. ही कारवाई शिवाजी पार्क पोलीस ठाणे यांनी केली होती. यानंतर त्यांना सैतान चौकी या दादर पोलीस ठाण्यात आणण्यात आले होते. तेथून त्यांना सोडून देण्यात आले असल्याचा दावा एका वरिष्ठ अधिकाऱ्यांनी केला. आचारसंहितेच्या पार्श्वभूमीवर आम्ही त्यांना काही वेळ पकडून सोडून दिले असल्याचे सांगण्यात आले. सुरुवातीला याबाबत काहीजणांना सैतान चौकी दादर पोलीस ठाणे आणि काही जणांना माहीम पोलीस ठाण्यामध्ये ठेवण्यात आल्याचे सांगण्यात आले. याविषयी स्थानिक पोलीस वरिष्ठ अधिकाऱ्यांनी अधिक माहिती देण्यास नकार दिला आहे.
