मुंबईत पहिल्यांदाच ध्वनीप्रदूषणमुक्त वातावरणात बाप्पाचे विसर्जन; 53 ते 100.7 डेसीबलपर्यंत आवाजाची नोंद

मुंबईत 53 ते 100.7 डेसीबल इतकी आवाजाची नोंद झाली आहे. त्यानुसार सर्वाधिक आवाजाची पातळी वरळी डेअरी येथे नोंदवली गेली आहे. येथेच काही प्रमाणात ढोल ताशे वाजवण्यात आल्याचे दिसून आले. 100.7 डेसीबल इतके येथे ध्वनीप्रदूषण होते. तर सर्वात कमी 53.1 डेसीबलची नोंद शिवाजी पार्क येथे झाली आहे.

मुंबई - गणेशोत्सव म्हटला की उत्साह, ढोल-ताशे, लाऊडस्पीकर, डीजे, फटाक्यांची आतषबाजी सगळं कसं साग्रसंगीत. त्यातही गणेश विसर्जन मिरवणुकीत हा उत्साह अधिक वाढतो. त्यामुळे साहजिकच दरवर्षी दीड दिवसांच्या गणपतीपासून ते 11 दिवसांच्या गणेश मूर्तीच्या विसर्जनापर्यंत मिरवणुकीची धामधूम काही औरच असते. तर त्याचवेळी मिरवणुकीदरम्यान ध्वनीप्रदूषण मोठ्या प्रमाणावर यामुळे वाढते. मात्र, यंदा पहिल्यांदाच मुंबईत ध्वनीप्रदूषणमुक्त वातावरणात दीड दिवसांच्या गणेश मूर्तींचे विसर्जन करण्यात आले आहे. यावेळी पहिल्यांदाच केवळ एक विभाग वगळता सर्वत्र 100 डेसिबलच्या आत आवाजाची पातळी नोंदवली गेली आहे. यावर आवाज फाऊंडेशनने समाधान व्यक्त करतानाच मुंबईकरांचे कौतुकही केले आहे. तर यासाठी मुख्यमंत्री उद्धव ठाकरे आणि पर्यावरण मंत्री आदित्य ठाकरे यांचेही आभार मानले आहेत.

आवाज फाउंडेशनकडून दरवर्षी गणेश विसर्जनादरम्यान होणाऱ्या आवाजाची पातळी तपासली जाते. तर सर्वच सण ध्वनीप्रदूषणमुक्त वातावरणात साजरे करण्यासाठी नागरिकांना आवाहन केले जाते. या जनजागृतीमुळे आणि डीजेवर बंदी आल्यामुळे गेल्या 10 ते 12 वर्षांत मुंबईत विसर्जनादरम्यान ध्वनीप्रदूषण हळूहळू कमी होऊ लागल्याची माहिती आवाज फाऊंडेशनच्या सुमेरा अब्दुलाली यांनी दिली आहे. तर यंदा पहिल्यांदाच मुंबईत ध्वनीप्रदूषणमुक्त वातावरणात विसर्जन पार पडले. कोरोनाच्या पार्श्वभूमीवर सरकार-मुंबई महानगरपालिकेने मिरवणुकीवर अनेक निर्बध आणले. तर मुंबईकरांनीही कोरोनाच्या संकटाचे भान राखत सहकार्य केल्यानेच हे शक्य झाल्याचे म्हणत अब्दुलाली यांनी मुंबईकरांचे विशेष कौतुक केले आहे. रविवारी दीड दिवसांच्या गणपती विसर्जनादरम्यान मुंबईत 54 ते 100.7 डेसीबील इतक्याच आवाजाची नोंद झाली आहे. एरव्ही मुंबईत यादरम्यान 100 ते 122 डेसीबल इतकी आवाजाची पातळी असते. पण यंदा मात्र समाधानकारक चित्र मुंबईत पाहायला मिळाल्याचेही त्यांनी सांगितले आहे. कॊरोनामुळे मिरवणूक नव्हती. त्यामुळे ढोल-ताशे नव्हते. तर दुसरीकडे कृत्रिम तलावावर पालिकेने भर दिला होता. त्यामुळे घराजवळच विसर्जन करण्यास प्राधान्य दिले. त्यामुळेही ध्वनीप्रदूषण कमी झाले. वरळी डेअरी येथे 100.7 डेसीबल इतकी नोंदमुंबईत 53 ते 100.7 डेसीबल इतकी आवाजाची नोंद झाली आहे. त्यानुसार सर्वाधिक आवाजाची पातळी वरळी डेअरी येथे नोंदवली गेली आहे. येथेच काही प्रमाणात ढोल ताशे वाजवण्यात आल्याचे दिसून आले. 100.7 डेसीबल इतके येथे ध्वनीप्रदूषण होते. तर सर्वात कमी 53.1 डेसीबलची नोंद शिवाजी पार्क येथे झाली आहे. वरळी डेअरी पाठोपाठ वरळी नाका येथे 91 डेसीबल इतकी आवाजाची पातळी नोंदवण्यात आली आहे. येथे फटाक्यांचा आवाज होता. तर बाकी परिसरात मात्र 60 ते 90 डेसीबल आवाज होता.