मुंबई - मनसे कार्यकर्त्यांनी विक्रोळी येथे ईव्हीएम मशीनविरोधात निदर्शने केली. यावेळी ईव्हीएम हटावचा नारा देण्यात आला. तसेच येत्या २१ तारखेला ईव्हीएमविरोधात सर्वपक्षीय मोर्चा काढला जाणार असल्याचे सांगितले. त्याचीच पूर्वतयारी म्हणून सोमवारी निदर्शने करण्यात आली.
महाराष्ट्र नवनिर्माण सेनेचे प्रमुख राज ठाकरे यांनी ईव्हीएम हटावचा नारा दिला आहे. त्यांनी ईव्हीएमबाबत दिल्लीत निवडणूक आयोगाची भेट घेतली होती. तसेच पश्चिम बंगालच्या मुख्यमंत्री ममता बॅनर्जी यांचीही भेट घेतली होती. राज्यातील विरोधी पक्षाची एकत्र मोट बांधून ईव्हीएमविरोधात एकत्र येत लढा देण्याचे आवाहन त्यांनी केले. येत्या विधानसभा निवडणुकीत बॅलेट पेपरवर मतदान झाले पाहिजे यासाठी येत्या २१ ऑगस्टला मनसे व राज्यातील विरोधी पक्ष मोर्चा काढणार आहेत. तसेच लोकसभा निवडणुकीत मतदानात झालेली तफावत विधानसभा निवडणुकीमध्ये दिसू नये यासाठी हा मोर्चा असणार आहे.
येत्या २१ ऑगस्टच्या आंदोलनाची पूर्वतयारी म्हणून विक्रोळी स्थानकाच्या पूर्वेला रेल्वे फाटकाजवळ मनसेने निदर्शने केली. यावेळी विक्रोळी विधानसभा क्षेत्रातील सर्व पदाधिकारी आणि कार्यकर्ते मोठ्या संख्येने उपस्थित होते.
