मुंबई - डोंबिवली शहरात एका 17 वर्षीय अल्पवयीन मुलीवर भाजपचा पदाधिकारी गेली 4 वर्षे बंदुकीचा धाक दाखवून शारीरिक अत्याचार करत होता. याप्रकरणी पोलिसांनी संबंधित पदाधिकाऱ्याला पॉक्सो कायद्याअंतर्गत अटक केली होती. मात्र, जामीन मिळाल्यानंतरही संबंधित पदाधिकारी पीडित मुलगी व तिच्या कुटुंबीयांना त्रास देत आहे. यामुळे संबंधित आरोप असलेल्या भाजपच्या पदाधिकाऱ्याला येत्या सुनावणीत जामीन मिळू नये व लवकरात लवकर निर्भया प्रकरणातील आरोपींना फाशी मिळण्यापूर्वी याला न्यायालयाने शिक्षा द्यावी, अशी मागणी शिवसेना प्रवक्त्या व आमदार डॉ. मनिषा कायंदे व राष्ट्रवादीच्या नेत्या विद्या चव्हाण यांनी शिवालय येथे आयोजित पत्रकार परिषदेत केली आहे.
या प्रकरणात पोलिसांची भूमिका देखील संशयास्पद आहे. पीडित मुलीसह तिचे पालक व लहान बहिणीला देखील धमकवण्याचे काम सुरू असताना तक्रार करायला गेल्यावर पीडितेची तक्रार न घेता ती टाळण्याचा प्रयत्न करणाऱ्या संबंधित पोलीस ठाण्यातील अधिकाऱ्यांवर देखील कठोर कारवाई करावी, अशी मागणी कायंदे यांनी केली. तसेच या प्रकरणातील सरकारी वकील बदलून महिला वकिलाची नेमणूक करण्यात यावी, असे कायंदे म्हणाल्या.
पीडित मुलीला न्याय मिळावा, यासाठी लवकरच मुख्यमंत्री उध्दव ठाकरे व गृहमंत्री अनिल देशमुख यांची भेट घेण्यात येणार आहे. तसेच भाजपचे प्रदेशाध्यक्ष चंद्रकांत पाटील यांनी अशा प्रवृत्तीच्या भाजपच्या पदाधिकाऱ्याला पक्षात थारा न देता त्याला पक्षातून काढून कारवाई करावी. राजकारण बाजूला ठेवून पीडित मुलीच्या पाठीशी खंबीरपणे उभे राहून तिला मदत करावी, यासाठी लवकरच राष्ट्रवादीच्या नेत्या विद्या चव्हाण, आम्ही एकत्र भेट घेणार असल्याचे कायंदे म्हणाल्या.
प्रत्यक्ष व अप्रत्यक्षपणे आरोपी संदीप माळी मला व माझ्या कुटुंबीयांना धमकावत आहे. त्यामुळे लवकरात लवकर माळी याला शिक्षा होऊन मला न्याय मिळावा, अशी मागणी पीडित तरुणीने केली आहे. कोणत्याही पक्षात संदीप माळीसारखे पदाधिकारी असतील तर त्यांना बडतर्फ करायला हवे. अशा आरोपींचा जामीन रद्द होऊन ते तरुंगात असायला हवे. आमचे सरकार सत्तेत आले आहे, त्यामुळे अशा अत्याचारांना थांबवण्याची जबाबदारी महाराष्ट्र सरकारची आहे, असे राष्ट्रवादीच्या नेत्या विद्या चव्हाण यांनी म्हटले.
हेही वाचा - 'कोकणासाठी स्वतंत्र विद्यापीठाच्या स्थापनेसाठी समिती स्थापन करावी'
