मुंबई Milind Deora : मुंबई काँग्रेसचे ज्येष्ठ नेते आणि माजी केंद्रीय मंत्री मिलिंद देवरा यांनी रविवारी मुख्यमंत्री एकनाथ शिंदे यांच्या उपस्थितीत शिंदे गटात प्रवेश केला. त्यांच्यासोबत 10 माजी नगरसेवक, 20 पदाधिकारी, 15 महत्त्वपूर्ण व्यापारी संघटनांचे अध्यक्ष आणि सुमारे 450 कार्यकर्त्यांनी शिंदे गटात प्रवेश केला.
काँग्रेसशी 55 वर्षांचं नातं संपुष्टात : दक्षिण मुंबईतील लोकसभेचे माजी खासदार देवरा यांनी रविवारी 'X' या सोशल मीडिया प्लॅटफॉर्मवर लिहिलं, "आज माझ्या राजकीय प्रवासातील महत्त्वाच्या अध्यायाचा अंत झाला. मी काँग्रेसच्या प्राथमिक सदस्यत्वाचा राजीनामा दिला असून यासोबतच माझ्या कुटुंबाचं पक्षाशी असलेलं 55 वर्षांचं नातं संपुष्टात आलं. मी सर्व नेते, सहकारी आणि कार्यकर्त्यांचा वर्षानुवर्षे अखंड पाठिंबा दिल्याबद्दल त्यांचा आभारी आहे". "एकनाथ शिंदे यांना मुंबई आणि महाराष्ट्राच्या हितासाठी काम करणारी चांगली लोक हवी आहेत. खासदार होऊन मी या व्हिजनचं उत्तम प्रतिनिधित्व करू शकतो, असं एकनाथ शिंदे आणि श्रीकांत शिंदे यांना वाटतं. त्यांचं समर्थन आणि विश्वासाबद्दल मी आभार व्यक्त करतो", असं मिलिंद देवरा यावेळी म्हणाले.
देवरा विरुद्ध सावंत : विशेष म्हणजे, मिलिंद देवरा यांच्यासोबत शिवसेनेत प्रवेश करणारे बहुतेक नेते आणि पदाधिकारी हिंदी भाषिक आहेत. गेल्या 2 लोकसभा निवडणुकांमध्ये देवरा यांना शिवसेनेच्या अरविंद सावंत यांच्याकडून पराभव पत्कारावा लागला होता. आता आगामी निवडणुकीतही देवरा विरुद्ध सावंत अशी लढत होण्याची शक्यता आहे. अरविंद सावंत यांना दक्षिण मुंबईतील मराठी मतांचं समर्थन आहे. मात्र येत्या निवडणुकांमध्ये येथून मनसेचे बाळा नांदगावकर निवडणूक लढवतील अशा चर्चा आहेत. अशा परिस्थितीत मराठी मतांचं विभाजन झालं तर त्याचा फायदा मिलिंद देवरांना मिळू शकतो.
संजय राऊत यांची प्रतिक्रिया : माजी केंद्रीय मंत्री मिलिंद देवरा गेल्या काही दिवसांपासून एकनाथ शिंदे यांच्या नेतृत्वाखालील शिवसेनेत प्रवेश करणार असल्याची चर्चा होती. देवरा यांनी काँग्रेस सोडल्याच्या पार्श्वभूमीवर शिवसेना (उद्धव बाळासाहेब ठाकरे) नेते संजय राऊत यांनी प्रतिक्रिया दिली आहे. "दक्षिण मुंबई लोकसभा जागेवर कोणतीही तडजोड केली जाणार नाही", असं ते म्हणाले.
गेल्या 2 निवडणुकांमध्ये पराभव : मिलिंद देवरा दक्षिण मुंबई लोकसभा मतदारसंघातून काँग्रेसचे खासदार राहिले आहेत. मात्र 2014 आणि 2019 च्या सार्वत्रिक निवडणूक शिवसेनेचे अरविंद सावंत यांनी त्यांचा पराभव केला. "सावंत हे दोन वेळा खासदार आहेत. त्यांनी पुन्हा निवडणूक लढवण्यात गैर काय? याबाबत कोणतीही तडजोड केली जाणार नाही", असं संजय राऊत म्हणाले.
मिलींद देवरांसह या नगरसेवकांनी शिंदे गटात प्रवेश केला.
- प्रमोद मांद्रेकर, माजी नगरसेवक
- सुनिल नरसाळे, माजी नगरसेवक
- रामवचन मुराई , माजी नगरसेवक
- हंसा मारु, माजी नगरसेवक
- अनिता यादव, माजी नगरसेविका
- गजेंद्र लष्करी, माजी नगरसेवक
हे वाचलंत का :
