मुंबई - राज्य सरकारच्या नाकर्तेपणामुळे सर्वोच्च न्यायालयात मराठा समाजाच्या आरक्षणाला स्थगिती मिळाली. आता आणखी चार आठवडे ही स्थगिती उठवली जाणार नाही. या विरोधात राज्यातील मराठा समाजात तीव्र संतापाची लाट तयार झाली आहे. मराठा समाजाच्या विविध संघटनांतर्फे आता पंढरपूर ते मंत्रालय असा आक्रोश मोर्चा काढला जाणार आहे. मराठा क्रांती ठोक मोर्चाचे पदाधिकारी महेश डोंगरे यांनी मुंबईत पत्रकार परिषद घेऊन याबाबत माहिती दिली.
वीस दिवस पायी वाटचाल करणार मोर्चा -
7 नोव्हेंबरला दुपारी 12 वाजता पंढरपूर येथील विठ्ठलाचे आणि नामदेव पायरीचे दर्शन घेऊन मराठा आक्रोश मोर्चा मुंबईकडे निघणार आहे. अकलूज, बारामती, जेजुरी, पुणे मार्गे हा मोर्चा वीस दिवस पायी वाटचाल करत मंत्रालयापर्यंत पोहोचणार आहे. या दरम्यान प्रत्येक ठिकाणी विविध कार्यक्रमांचे आयोजन होणार आहे. मराठा आरक्षणाला सरकार गांभीर्याने घेत नाही. त्यामुळेच आक्रोश मोर्चा काढून त्यांच्या विरोधात संताप व्यक्त करावा लागत आहे. मराठा समाजाच्या मोर्चात राजकीय पक्षांना सामील करून घेतले जाणार नाही. समाजाचा भाग म्हणून नेते आल्यास त्यांचे आम्ही स्वागत करू, असेही यावेळी स्पष्ट करण्यात आले.
सरकारकडून आंदोलने दडपण्याचा होत आहे प्रयत्न -
सर्वोच्च न्यायालयाने मराठा आरक्षणाला स्थगिती दिल्यानंतर त्यासाठी अत्यंत शांततेत आंदोलने करत आहोत. मात्र, सरकारकडून आंदोलने दडपून टाकण्यासाठी बळाचा वापर केला जात आहे. आमचा आक्रोश मोर्चा सरकारला महागात पडेल, असा इशाराही मराठा क्रांती मोर्चा व सकल मराठा समाज संघटनेच्या प्रतिनिधींकडून देण्यात आला. शासनाने योग्य प्रतिसाद दिला असता तर कोरोनाच्या काळात मोर्चे काढण्याची वेळ आली नसती, असेही महेश डोंगरे म्हणाले.
तुळजापूर येथील मोर्चाला सरकारचा प्रतिसाद नाही -
तुळजापूर येथे 9 ऑक्टोबरला मराठा आरक्षण लढ्याच्या तिसऱ्या पर्वाला सुरुवात करण्यात आली होती. तुळजापूर शहरातील छत्रपती शिवाजी महाराज चौक ते तुळजाभवानी मंदिरापर्यंत मोर्चा काढण्यात आला होता. या आंदोलनात खासदार संभाजीराजे छत्रपती यांनी सहभाग घेतला होता. या मोर्चात 2 हजार 500 लोकांची गर्दी जमली होती. या मोर्चाला शासनाने कोणताही प्रतिसाद दिलेला नाही.
