मुंबई: 'हॉट डॉग' हा पदार्थ नेमका कसा असतो? हे वेगळे सांगण्याची गरज नाही. मात्र, तो आपल्याकडे ज्या पद्धतीने बनवून मिळतो ती ऑथेंटिक पद्धत नाही. आपल्याकडे हॉट डॉग बद्दल आकर्षण असणारे अनेक खवय्ये आहेत. या खवय्यांना परदेशात जो 'ऑथेंटिक हॉट डॉग' मिळतो तसा 'ऑथेंटिक हॉट डॉग' मुंबईतील स्ट्रीट फूडमध्ये मिळावा, यासाठी मुंबईच्या एका तरुणाने छोटा स्टार्टअप सुरू केला आहे. मुंबईच्या मालाड येथे राहणाऱ्या तरुणाने परदेशात मिळणारा 'ऑथेंटिक हॉट डॉग' मालाडच्या एव्हर शाईन भागात विकायला सुरुवात केली आहे.
डान्स करत बनवतो हॉट डॉग: मुंबईकरांच्या खिशाला परवडेल अशा किमतीत परदेशी पदार्थ 'हॉट डॉग' खायला देणाऱ्या या तरुणाचे नाव आहे अभिषेक वाधवा. अभिषेक डान्सर असून, तो डान्स करत आपल्या हॉट डॉगच्या दुकानात डान्स करत पदार्थ बनवतो आणि डान्स करतच ते लोकांना खाण्यासाठी सर्व्ह करतो. त्याची ही पद्धत अनेकांना आवडत असून, मुंबईकर सध्या अभिषेकच्या या स्टार्टअपकडे आकर्षित होत आहेत. फक्त डान्स करून काही भागत नसल्याने सोबत आणखी काहीतरी केले पाहिजे असे अभिषेकच्या मनात आले आणि त्याने मुंबईच्या रस्त्यांवर 'हॉट डॉग' विकण्याचा निर्णय घेतला.
आवड म्हणून तो बनला वेटर: पुढे बोलताना अभिषेकने त्याच्या प्रवासाबाबत सांगितले की, बारावी नंतर मी बॅचलर ऑफ मास मीडियाची डिग्री घेण्यासाठी प्रवेश घेतला. दोन वर्षे नियमित कॉलेजला गेलो. तिथे माझ्या बोलण्याची, प्रेझेंटेशनची शैली विकसित झाली. त्यातच मी लहानपणापासून डान्सर असल्याने माझे या क्षेत्रात मन लागत नव्हते. अखेर घरच्यांशी बोलून मी कॉलेज सोडले आणि एक रेस्टॉरंट जॉईन केले. तिथे मी वेटर म्हणून काम केले. आपल्या देशात एखाद्या ठिकाणी वेटर म्हणून काम करणे हे खालच्या दर्जाचे काम म्हणून पाहिले जाते. मात्र, तेच परदेशात एखाद्या रेस्टॉरंटमध्ये काम करणे ही एक पॅशन किंवा एक आवडीचे काम म्हणून केले जाते. तिकडे अनेक जण असे आहेत जे दिवसातून काही वेळ का होईना फ्रीमध्ये एखाद्या रेस्टॉरंटमध्ये वेटरचे काम करतात.
'हॉट डॉग' एक मांसाहारी पदार्थ: पुढे बोलताना अभिषेकने सांगितले की, रेस्टॉरंटमध्येच काम करताना मला 'हॉट डॉग' बनवण्याची कल्पना सुचली. मी घरच्यांकडून काही थोडे पैसे घेतले आणि माझी थोडी सेविंग असे एकत्र करून मुंबईत 'हॉट डॉग'चा व्यवसाय सुरू केला. आपल्याकडे 'हॉट डॉग'च्या नावाखाली अनेक बेकरी, दुकानांमध्ये गोल पावात साधी बटाट्याची भाजी आणि कोबी भरून दिला जातो. मात्र, ओरिजनल 'हॉट डॉग' हा शाकाहारी नाही तर हा एक मांसाहारी पदार्थ आहे. त्यामुळे मी 'ओरिजनल हॉट डॉग' मुंबईकरांना खायला देण्याचा निर्णय घेतला.
अभिषेकची महत्वाकांक्षा: 'ऑथेंटिक हॉट डॉग'मध्ये गोल भाजलेला पाव ज्यामध्ये काही सॉस, मसाले, कांदा व सॉसेजेस भरून हा हॉट डॉग तयार होतो. तोच 'ऑथेंटिक हॉट डॉग' मी मुंबईच्या स्ट्रीट फूडमध्ये आणला आहे. आपल्याकडे स्ट्रीट फूडच्या इतिहासात काही वर्षे मागे गेलात तर तुम्हाला सध्या जागोजागी दिसणारा शोर्मा हा मागच्या दहा वर्षांपूर्वी कुठेही दिसत नव्हता. तो एखाद्या व्यक्तीने सुरू केला असेल तर त्याचे बघून आज प्रत्येक गल्लीत एक ना एक शोर्मा विकणारा दिसतोच. माझी देखील तीच इच्छा आहे. मला ती व्यक्ती बनायचे आहे की, ज्याने मुंबईच्या 'स्ट्रीट फूड'मध्ये 'हॉट डॉग' सुरू केला आणि माझे बघून इथल्या प्रत्येक गल्लीत 'ऑथेंटिक हॉट डॉग' मिळायला सुरुवात झालेली असेल.
हेही वाचा: Nitin Gadkari News: नितीन गडकरी यांच्या संदर्भात जातिवाचक पोस्ट करणाऱ्याविरोधात गुन्हा दाखल
