CM Shinde On Dr. Ambedkar Memorial Fund : बाबासाहेबांच्या स्मारकासाठी निधी कमी पडू देणार नाही - मुख्यमंत्री एकनाथ शिंदे

आज भारतरत्न डॉ. बाबासाहेब आंबेडकर यांची १३२ वी जयंती देशभर साजरी केली जात असताना मुंबईत चैत्यभूमी येथेही बाबासाहेबांना मानवंदना देण्यासाठी हजारोंचा जनसमुदाय लोटला आहे. राज्य शासनाच्यावतीने आयोजित कार्यक्रमात राज्यपाल रमेश बैस, मुख्यमंत्री एकनाथ शिंदे, उपमुख्यमंत्री देवेंद्र फडणवीस यांच्या उपस्थितीत बाबासाहेबांना मानवंदना देण्यात आली. याप्रसंगी बोलताना मुख्यमंत्री एकनाथ शिंदे यांनी इंदू मिलच्या जागेवर उभारण्यात येत असलेल्या डॉ. बाबासाहेब आंबेडकर यांच्या स्मारकाला कुठल्याही प्रकारे निधी कमी पडू दिला जाणार नाही, असे सांगत हे स्मारक एका वर्षात पूर्ण केले जाईल अशी ग्वाही दिली.

मुंबई : राज्यपाल रमेश बैस यांनी या प्रसंगी महाराष्ट्रातील जनतेला बाबासाहेबांच्या १३२ व्या जयंती दिनानिमित्त शुभेच्छा दिल्या. ते म्हणाले, या आयोजनाने आज आनंद झाला आहे. अनेक देशात उत्सव साजरा केला जात आहे. महापालिकेला या आयोजनासाठी धन्यवाद. बाबासाहेबांच्या जीवनाचे अनेक पैलू आहेत. मुंबई, महाराष्ट्र ही त्यांची कर्मभूमी राहिली आहे. त्यांनी मानवी हितासाठी अनेक आंदोलने केली. इंदू मिलच्या जागी ऐतिहासिक स्मारक उभे राहील.