मुंबई - सुशांत सिंह राजपूत प्रकरणाला नविन वळण लागले आहे. रिया चक्रवर्तीने सुशांतची बहिण प्रियंका सिंह यांच्यासह डॉक्टर तरुण कुमार यांच्याविरोधात वांद्रे पोलीस ठाण्यात तक्रार नोंदवली आहे.
सुशांत सिंह राजपूत प्रकरणी नार्कोटिक्स कंट्रोल ब्युरोकडून तपास केला जात असताना, यामध्ये रिया चक्रवर्ती हिने सुशांत सिंहची बहीण प्रियंका सिंह व डॉ. तरुण कुमार यांच्याविरोधात तक्रार अर्ज दाखल केल्यानंतर सोमवारी एनसीबी चौकशी संपवून थेट वांद्रे पोलीस ठाणे गाठले. जर सुशांतच्या कुटुंबियांच्या तक्रारीवरून माझ्या विरोधात गुन्हा दाखल होत असेल तर सुशांतची बहिण प्रियंका सिंह हिच्या विरोधात गुन्हा दाखल करावा म्हणून रिया चक्रवर्ती हिने वांद्रे पोलिसांकडे मागणी केलेली होती. त्यानुसार, वांद्रे पोलीस ठाण्यामध्ये रिया चक्रवर्ती हिने दिलेल्या तक्रारी अर्जानंतर कलम 420, 464, 465, 466, 468, 474, 306 , 120 ब 34 आयपीसी आणि एनडीपीएस कायद्यानुसार गुन्हा नोंदविण्यात आलेला आहे.
सुप्रिम कोर्टाच्या निर्देशानुसार मुंबई पोलिसांच्या वांद्रे पोलीस ठाण्यात गुन्हा नोंदविण्यात आल्यानंतर सदरचा गुन्हा सीबीआयकडे पुढील तपासासाठी वर्ग करण्यात आलेला आहे.
काय म्हटले आहे रियाने तिच्या तक्रारीत -
रिया चक्रवर्तीने तिच्या तक्रारीत म्हटले आहे की, राम मनोहर लोहिया रुग्णालयाचे हृदयविकार तज्ञ डॉक्टर तरुण कुमार यांच्या चिट्टीवरून सुशांत सिंहला एनडीपीएस अंतर्गत बंदी घालण्यात आलेली औषध देण्यात आली. डॉक्टर तरुण कुमार यांच्याकडे सुशांत कुठल्याही प्रकारचे उपचार घेत नसतानाही औषधांची प्रिस्क्रिप्शन सुशांतला देण्यात आल्याचा आरोप रिया चक्रवर्ती हिने केला आहे. डॉक्टर तरुण कुमार यांनी जी औषध दिली आहेत, ती मेडिकल कौन्सिल ऑफ इंडियाच्या टेलीमेडिसीन गाईडलाईन नुसार योग्य नव्हती, असे रियाचे म्हणणे आहे.
8 जून 2020 रोजी रिया चक्रवर्ती ही सुशांत सिंहच्या सोबत होती. यावेळी सुशांत सिंह हा त्याच्या मोबाईल फोनवर सतत मेसेज करत होता. त्यावेळेस रिया चक्रवर्तीने तू कोणाला मेसेज करतो असे विचारले असता त्याने त्याच्या मोबाईल फोन वर त्याच्या बहिणीने पाठवलेला मेसेज दाखवला. यामध्ये प्रियंका सिंह हिने सुशांत सिंहला काही औषधांची यादी पाठवलेली होती आणि त्यात म्हटलं होतं की औषध सुशांतने घ्यावीत.
