मुंबई Mumbai Housing : हिंदू धर्मामध्ये वर्षात साडेतीन मुहूर्त शुभ आणि महत्वाचे मानले जातात. गुढीपाडवा, अक्षय तृतीया, दसरा आणि दिवाळीतील पाडवा. या साडेतीन मुहूर्ताला सोनं-चांदी, वाहन तसंच गृहप्रवेश आणि नवीन घर खरेदी केली जाते. देशात सर्वाधिक महागडी घरं ही मुंबईत आहेत. मुंबईत घर खरेदी करण्याचं अनेकांचं स्वप्न असतं. पण घरांच्या किंमती आणि जागेचा गगनाला गेलेला भाव पाहता, सर्वसामान्यांना मुंबईत घर खरेदी करणं परवडत नाही. मात्र, असं असलं तरी प्रत्येक वर्षी मुंबईत दिवाळी सणात घरांची मोठ्या प्रमाणात खरेदी केली जाते. दरम्यान, यावर्षी देखील दिवाळीत मोठ्या प्रमाणात घरांची खरेदी झाल्याची माहिती समोर आली असून यंदा 1 ते 13 नोव्हेंबर या कालावधीत शहरात 5,143 घरांची विक्री झाली आहे.
महारेराकडे 824 नवीन गृह प्रकल्पांच्या नोंदणी : दिवाळीच्या मुहूर्तावर 824 नवीन गृहनिर्माण प्रकल्पांच्या नोंदणी झाल्या आहेत. ऑक्टोबर महिन्यात 645 तर 13 नोव्हेंबरपर्यंत 178 अशा एकूण 824 नवीन गृहनिर्माण प्रकल्पांची महारेरात नोंदणी मंजूर झाल्याची माहिती महारेराचे अध्यक्ष, अजय मेहता यांनी दिली आहे. घर खरेदी करणाऱ्यांची फसवणूक होऊ नये म्हणून, तसंच बिल्डरांच्या शंका आणि नोंदणीसाठी आलेल्या प्रत्येक प्रकल्पाची आर्थिक कायदेविषयक आणि तांत्रिक पडताळणी कठोरपणे केली जाते, असं देखील महारेराचे अध्यक्ष अजय मेहता यांनी सांगितलं.
मुंबईत 1 ते 13 नोव्हेंबर या कालावधीत 5,143 जणांनी नवीन घरांची खरेदी केली आहे. मागील वर्षी नोव्हेंबर महिन्यात 8,965 घरांची विक्री झाली होती. तर मागील वर्षी ऑक्टोबरमध्ये घरांच्या विक्रीतून 835 कोटींचा महसूल मिळाला होता. दरम्यान, मागील दोन दिवसांपासून नोंदणी व मुद्रांक विभागाच्या कार्यालयांना सुट्टी असल्यानं दिवाळीत पाडव्याच्या मुहूर्तावर किती जणांनी नवीन घर खरेदी केलं, याची आकडेवारी अजूनपर्यंत समोर आली नाही. मात्र, मुंबईत घरांच्या किंमती जरी महाग असल्या तरी देखील दिवाळीत पाडव्याच्या मुहूर्तावर घर खरेदी करण्याकडं अनेकांचा कल असतो.
हेही वाचा-
- Atul Save On OBC House : ओबीसींसाठी आनंदाची बातमी; दहा लाख घरे मिळणार बांधून, गृहनिर्माण मंत्री सावे यांची माहिती
- MHADA Flat Lottery In Pune: म्हाडाकडून एकूण 6058 सदनिकांची ऑनलाईन सोडत; अनेकांना लागली घरांची लॉटरी
- Mhada Lottery 2023 : म्हाडाच्या घरांसाठी अर्ज करणं आणखी सोपं; एकदाच नोंदणी करुन अर्ज करता येणार
