DHFL-UBI Fraud Case : वाधवान बंधूंची 70 कोटींची मालमत्ता ईडीकडून जप्त, ५ कोटींच्या घड्याळ्यांसह 'या' मालमत्तेचा समावेश

DHFL-UBI Fraud Case : 34 हजार कोटींच्या बँक घोटाळा प्रकरणी तुरुंगात असलेले ‘डीएचएफएल’ संचालक वाधवान बंधूंची 70.39 कोटींची मालमत्ता ईडीनं तात्पुरत्या स्वरूपात जप्त केली आहे. फसवणूक प्रकरणात ईडीनं ही कारवाई केली आहे.

मुंबई DHFL-UBI Fraud Case : DHFL-UBI फसवणूक प्रकरणात कपिल वाधवान आणि धीरज वाधवान यांच्यावर ईडीकडून मोठी कारवाई करण्यात आलीये. वाधवान बंधूंची तब्बल 70.39 कोटींची मालमत्ता ईडीनं तात्पुरत्या स्वरूपात जप्त केलीये. मनी लाँडरिंग प्रतिबंध कायदा, 2002 (PMLA) च्या तरतुदींनुसार ही कारवाई करण्यात आली आहे. तर जप्त केलेल्या 70 कोटी 39 लाखांच्या मालमत्तेमध्ये 28.58 कोटीची संलग्न मालमत्ता, पाच कोटी रुपयांची घड्याळे, हिऱ्यांचे दागिने ज्याची किंमत 10.71 कोटी, हेलिकॉप्टरमधील 20% स्टेक, 9 कोटी आणि 17.10 कोटीची किंमत असलेल्या वांद्रे येथील दोन फ्लॅट्सचा समावेश आहे.

ईडीच्या तपासात तत्थ्य आलं समोर : कपिल वाधवान आणि धीरज वाधवान, डीएचएफएलचे दोन्ही संचालक आणि इतर आरोपींनी युनियन बँक ऑफ इंडिया (यूबीआय) च्या नेतृत्वाखालील 17 बँकांच्या कन्सोर्टियमची फसवणूक करण्याचा गुन्हेगारी कट रचला असल्याचं ईडीच्या तपासात उघड झालंय. कपिल वाधवान आणि इतरांनी कन्सोर्टियम बँकांना 42,871.42 कोटी रुपयांची मोठी कर्जे मंजूर करण्यास प्रवृत्त केलं. तसंच हे उघड झालंय की, कन्सोर्टियम बँकांच्या कायदेशीर थकबाकीची परतफेड करण्या आली नाही. त्यामुळे कन्सोर्टियम कर्जदारांना 34,615 कोटींचे नुकसान झाले.

• 50 कोटींची मालमत्ता जप्त : यापूर्वी ईडीनं वाधवान बंधूंची 50 कोटी रुपयांची मालमत्ता जप्त केली होती. तसंच येस बँक डीएचएफएल फसवणूक प्रकरणात कपिल वाधवान आणि धीरज वाधवान यांना अटक करण्यात आली आहे. ते दोघेही सध्या न्यायालयीन कोठडीत आहेत. ईडीनं वाधवानांची 5 कोटी रुपयांची वाहनंही जप्त केली आहेत.

काय आहे प्रकरण : 17 बँकांच्या समूहाची 34 हजार 615 कोटी रुपयांची फसवणूक केल्याप्रकरणी केंद्रीय अन्वेषण विभागानं (सीबीआय) दीवान हाऊसिंग फायनान्स लिमिटेड कंपनीचे (डीएचएफएल) संचालक कपिल वाधवान, धीरज वाधवान आणि इतर आरोपींविरोधात गुन्हा दाखल केला होता. या प्रकरणी गेल्या वर्षी सीबीआयने 12 ठिकाणी छापे टाकले होते. सीबीआयने कपिल वाधवान, धीरज वाधवान, सुधाकर शेट्टी, अमेरीलिस रियल्टर्स, गुलमर्ग रियल्टर्स, स्कायलार्क बिल्डकॉन प्रायव्हेट लिमिटेड, दर्शन डेव्हलपर्स, सिगटिया कन्स्ट्रक्शन, क्रिएटोज बिल्डर्स, टाउनशिप डेव्हलपर्स प्रायव्हेट लिमिटेड, शिशिर रिअ‍ॅल्टी प्रायव्हेट लिमिटेड, सनिब्लक रिअल इस्टेट व अनोळखी सरकारी कर्मचारी व काही व्यक्तींविरोधात गुन्हा दाखल करण्यात आला. त्यांच्याविरोधात युनियन बँक ऑफ इंडियाच्या अध्यक्षतेखालील 17 बँक समूहांची फसवणूक करून 34 हजार 615 कोटी रुपयांच्या गैरव्यवहार केल्याप्रकरणी गुन्हा दाखल करण्यात आला होता.

हेही वाचा -