मुंबई - आज सोमवारपासून गणेशोत्सवाला सुरुवात झाली आहे. त्यामुळे मुंबईतील प्रसिद्ध लालबागच्या राजाच्या दर्शनासाठी भाविकांनी रात्रीपासूनच गर्दी केली आहे. आज सकाळी बाप्पाच्या आरतीनंतर भाविकांनी दर्शन घ्यायला सुरुवात केली.
दरवर्षी प्रमाणे यंदाही संपूर्ण भारतात गणेशोत्सवाची लगबग पाहायला मिळत आहे. गणेशोत्सव सर्वत्र मोठ्या उत्साहात आणि आनंदात साजरा करण्यात येत आहे. यादिवशी केवळ मंदिरातच नाही, तर घरांमध्ये, सार्वजनिक मंडळात गणपती बाप्पांच्या मूर्तींची स्थापना करण्यात येत आहे. आज गणेशोत्सवाचा पहिला दिवस आहे. मुंबईतील लालबागच्या राजाचे दर्शन घेण्यासाठी देश-विदेशातून भाविक आले आहेत. बाप्पाचे दर्शन घेतानाच गणपती बाप्पा मोरयाच्या जयघोषांनी संपूर्ण परिसर दणाणून सोडला. दर्शनाला सुरुवात झाल्यानंतर एकच गर्दी उसळली. त्यामुळे परिसर फुलून निघाला होता. विशेष म्हणजे पहिल्याच दिवशी बाप्पाचे दर्शन करण्यासाठी अनेकजण रात्रापासूनच लालबागमध्ये दाखल झाले होते. पुढील १० दिवस गर्दी आणखी वाढण्याची शक्यता आहे.
'असा' साकारला देखावा -
लालबागचा राजा सार्वजनिक उत्सव मंडळाने यंदा भारताची अंतराळ संशोधन संस्था 'इस्रो'च्या कार्य कर्तृत्वाला सलाम करणारा देखावा साकारला आहे. भारताने 'चांद्रयान-२'चे यशस्वी प्रक्षेपण केले. त्यामुळे आपल्या शास्त्रज्ञांच्या कार्याचे या देखाव्यामधून कौतुक केले आहे.
नुकतेच इस्रोने अवकाशात सोडलेले 'चांद्रयान २' चंद्राच्या कक्षेत प्रदक्षिणा घालत आहे. चांद्रयान २ मधून लँडर 'विक्रम' ७ सप्टेंबर २०१९ ला पहाटे चांद्रभूमीवर सॉफ्ट लँडिंग करणार आहे. या पार्श्वभूमीवर भारताने अंतराळ क्षेत्रात केलेली प्रगती या देखाव्यात साकारली आहे. त्यामुळे यंदा लालबागचा राजा चांद्रभूमीवर विराजमान झालेला आहे.
भारताच्या 'चांद्रयान २' मोहिमेसोबत भविष्यातील 'गगनयान' या भारतीय अंतराळवीरांना अवकाशात घेऊन जाणाऱ्या मोहिमेसाठीही लालबागचा राजाकडून शुभेच्छा देण्यात आल्या आहेत. भारताला सुपर पॉवर बनवण्यासाठी इस्रो ऐतिहासिक कामगिरी करीत आहे. त्यामुळे त्यांच्या या कर्तृत्वाचा गौरव लालबागच्या राजाच्या राजेशाही दरबारात पाहायला मिळणार आहे, असे मंडळाच्या पदाधिकाऱ्यांनी सांगितले.
