मुंबई - स्वाभिमान पक्षाचे अध्यक्ष खासदार नारायण राणे एनडीएचे घटक आहेत. सध्या त्यांचे प्रश्न हे राज्याच्या हातात नसून दिल्लीतले नेते त्यांचा प्रश्न सोडवतील, असे मत महसूल मंत्री चंद्रकांत पाटील यांनी व्यक्त केले.
भाजप आणि शिवसेनेच्या युतीवर शिक्कामोर्तब झाल्यानंतर ही राणे यांनी युतीतील घटक पक्ष शिवसेनेवर टीका केली. युतीच्या लोकसभा उमेदवारांची यादी जाहीर होण्यापूर्वीच राणे यांनी आपले पुत्र माजी खासदार निलेश राणे यांची उमेदवारी घोषित केल्याने, भाजप पुढे पेच निर्माण झाला आहे. तसेच शिवसेनेच्या सर्व अटी मान्य करत भाजपने सेनेला युतीत सामावून घेतले आहे. या स्थितीत ही राणे शिवसेनेला लक्ष करत असल्याचे महसूल मंत्री चंद्रकांत पाटील यांच्या निदर्शनाला आणल्यानंतर त्यांनी याबाबत ठोस बोलणे टाळले. राणे हे स्वाभिमानी नेते आहेत, ते खासदार असल्याने त्यांचे प्रश्न दिल्लीतील नेतेच सोडवतील, अशी माहिती पाटील यांनी दिली.
नारायण राणे यांनी केवळ सिंधुदुर्गची जागाच नाही तर अन्य ५ ठिकाणी स्वाभिमान पक्षाचे उमेदवार देणार असल्याचे जाहीर केले आहे. राणे आणि शिवसेना यांच्यातील संबंध सर्वश्रुत आहेत. मात्र, या संबंधांचा युतीवर परिणाम होऊ नये, याची काळजी घेताना भाजपची दमछाक होत असल्याचे भाजपच्या अनेक नेत्यांनी खासगीत कबुल केले आहे.
