मुंबई - अण्णासाहेब पाटील आर्थिक मागास विकास महामंडळावर मागील भाजप सरकारच्या काळात झालेल्या राजकीय नियुक्त्या महाविकास आघाडी सरकारने रद्द केल्या आहेत. त्यात अध्यक्ष, उपाध्यक्ष, अशासकीय सदस्य व विशेष निमंत्रित यांचा समावेश आहे. त्यानंतर राजकारण पेटले आहे. यावर मंडळाचे माजी अध्यक्ष नरेंद्र पाटील यांनी बुधवारी पत्रकार परिषद घेतली. त्यात त्यांनी सरकारवर टिका केली आणि मराठा समाजाच्या मागण्यांसाठी लढतोय, त्यामळे नियुक्ती रद्द केल्याचा आरोप त्यांनी केला.
मी राजकारणाचा बळी ठरलो-
मी राजकारणाचा बळी ठरलो आहे. मराठा आरक्षण प्रश्नी मी अशोक चव्हाण यांच्याबाबत भूमीका घेतली. ती कदाचित सरकारला रुचलेली नसेल, असे नरेंद्र पाटील म्हणाले. त्यामुळेच आकसापोटी ही नियुक्त रद्द केल्याचा आरोप त्यांनी केला.
अशोक चव्हाण यांच्यामुळे मराठा समाजाचे नुकसान-
अशोक चव्हाण यांच्यामुळे मराठा समाजाचे प्रचंड नुकसान झाले आहे. त्यांच्यामुळे समाजाला अनेक अडचणींचा सामना करावा लागला आहे. त्यामुळे चव्हाण यांच्या राजीनाम्याची मागणी कायम राहणार आहे. त्याठिकाणी एकनाथ शिंदे यांची नियुक्ती लवकरात लवकर व्हावी असेही ते म्हणाले.
महामंडळावर चांगले काम केले
मी अण्णासाहेब पाटील आर्थिक मागास विकास महामंडळासाठी चांगलं काम करून देखील माझी नियुक्ती रद्द केली. अशोक चव्हाण यांना हटवा यासाठी मराठा समाजाचा सरकारवर दबाव आहे. तरी देखील मुख्यमंत्री त्यांना हटवत नाहीत. त्यामुळे नक्कीच मुख्यमंत्री दबावाखाली काम करत असल्याचे पाटील म्हणाले.
राष्ट्रवादीने देखील टाकला दबाव-
तसेच पाटील यांनी राष्ट्रवादी कॉंग्रेसवर देखील आरोप केले. मी राष्ट्रवादीचा आमदार असताना सरकार विरोधातच मराठा आरक्षणासाठी मोर्चा काढला होता. शिवाय राष्ट्रवादीच्या उमेदवारासमोर मी निवडणूक देखील लढलो आहे. सध्या कौशल्य विकास खातं राष्ट्रवादीकडे आहे. त्यामुळे राष्ट्रवादीने देखील मुख्यमंत्र्यांवर दबाव टाकला असल्याची शक्यता नाकारता येत नाही, असे पाटील म्हणाले.
तर मी स्वतःच राजीनामा दिला असता-
महामंडळावरच्या नियुक्त्या रद्द करणे, हा निर्णय अपेक्षित जरी असला तरी कुठेतरी अपमानास्पद वागणूक दिल्याची भावना त्यात आहे. मुख्यमंत्री यांनी बोलावून सांगितलं असतं तर मी स्वतःच राजीनामा दिला असता. हे करण्यापूर्वी चर्चा तरी करायला हवी होती, अशी भावना पाटील यांनी व्यक्त केली.
आपण स्वगृही परतनार का, असा प्रश्न विचारला असता पाटील म्हणाले, मी याबाबत आद्यप काहीच निर्णय घेतला नाही. मी मुख्यमंत्री उद्धव ठाकरे यांची भेट घेणार आहे. त्यानंतर माजी मुख्यमंत्री देवेंद्र फडणवीस यांना देखील भेटेल. त्यानंतर पुढील भुमिका जाहीर करणार असल्याचे त्यांनी सांगितले.
हेही वाचा- BREAKING: रायगड येथील रोहा एमआयडीसीमधील सुदर्शन कंपनीला भीषण आग
हेही वाचा- ‘आयसीयू’मधील कोरोना रुग्णाशी व्हिडिओ कॉलिंगद्वारे बोला; आरोग्य यंत्रणेचा नाविण्यपूर्ण उपक्रम
