मुंबई - भायखळा विधानसभा मतदार संघात आमदारांनी काही केले नसल्याचे समजून आल्याने सर्व धर्मीय यामिनी जाधव यांच्या प्रचारात झाडून उतरले आहेत. यामुळे आता मतदारांनी वांद्र्याचे पार्सल वांद्र्याला पाठवून भायखळ्याचे पार्सल म्हणजेच यामिनी जाधव यांना विधानसभेत पाठवावे, असे आवाहन करत वारीस पठाण यांच्यावर केंद्रीय अवजड उद्योग मंत्री अरविंद सावंत यांनी टीका केली.
भायखळा विधानसभा मतदार संघामधून महायुतीच्या उमेदवार यामिनी जाधव यांच्या प्रचार कार्यालयाचे उद्घाटन केंद्रीय अवजड उद्योग मंत्री अरविंद सावंत यांच्या हस्ते करण्यात आले. त्यावेळी सावंत बोलत होते. यावेळी बोलताना मतदारांनी तिसरा डोळा उघडून सर्व विरोधी उमेदवारांना घरी बसवावे, असे आवाहन सावंत यांनी केले.
मुंबई महापालिका निवडणुकीत यशवंत जाधव व यामिनी जाधव दोघांनी निवडणूक लढवली. त्यात यामिनी जाधव यांचा पराभव झाला. मात्र, यामिनी जाधव या सध्या विधानसभा निवडणूक लढवत आहेत. काल आमच्या सोबत नसलेले मनोज जामसुतकर आमच्या सोबत आहेत. यामुळे आमचा विजय निश्चित असल्याचे सावंत म्हणाले.
हेही वाचा - विधानसभा निवडणुकीत 9 हजार 673 केंद्रातील मतदानाचे होणार लाइव्ह वेबकास्ट
डॉकयार्डला बाबू गेनू इमारत कोसळली. त्या दुर्घटनेत अनेकांचे जीव गेले. त्यांच्या कुटुंबियांना मदत करा, याला जबाबदार असलेल्यांना सोडू नका, असे म्हणत यामिनी जाधव पालिका सभागृहात ढसाढसा रडल्या होत्या. ही संवेदनशीलता त्यांच्यात आहे. यामुळे संवेदनशील असलेल्या यामिनी जाधव यांना विधानसभेत पाठवा, असे आवाहन सावंत यांनी यावेळी केले.
हेही वाचा - पीएमसी बँक घोटाळा : 'नो बेल ओनली जेल', आरोपींना न्यायालयामध्ये हजर करणार
