मुंबई - दिल्ली येथील तबलिगी या धार्मिक कार्यक्रमात सहभागी नागरिक देशभर आपआपल्या गावी परतले होते. त्यातील काहींना कोरोनाची लागण झाल्याचे आढळून आल्याने संपूर्ण देशात सध्या भीतीचे वातावरण आहे. मात्र, दिल्लीसारखी परिस्थिती महाराष्ट्रात होता होता वाचली आहे. दिल्लीसारखाच तबलिगी हा धार्मिक कार्यक्रम वसई येथे होणार होता. गृह विभागाने वेळीच सतर्कता बाळगून परवानगी नाकारल्याने कोरोनाचा प्रादुर्भाव रोखता आला असल्याचे अनिल देशमुख यांनी म्हटले आहे.
पालघर जिल्ह्यातील वसई ( पश्चिम) येथील दिवानमान या गावालगतच्या परिसरात तबलिगी इज्तेमा या धार्मिक कार्यक्रमास परवानगीची मागणी करण्यात आली होती. शमीम एज्युकेशन अँड वेलफेअर सोसायटीने गृह विभागास रितसर पत्र देऊन परवानगी मागितली होती. १४ आणि १५ मार्चलाा वसई येथे हा धार्मिक कार्यक्रम होणार होता. या कार्यक्रमास साधारणपणे ५० हजार भाविक जमणार असल्याचे स्थानिक पोलीस प्रशासनाला संबंधित आयोजक संस्थेच्यावतीने कळविण्यात आले होते.
सोसायटीच्या विनंतीवरून पोलीस यंत्रणेने ५ फेब्रुवारी २०२० ला कार्यक्रमास परवानगी देत असल्याचे कळवले होते. दरम्यान देशासह राज्यात कोरोनाचे रुग्ण आढळून आले. अनेकांना क्वारंटाईन करण्यात आले. काही संशयितांवर उपचार सुरू करण्यात आले होते. अशा परिस्थिती ५० हजार नागरीक एकत्र येणे कोरोना विषाणू नियंत्रणाच्या दृष्टीने धोकादायक होते. अशा धार्मिक कार्यक्रमातील भाविकांच्या जमावापासून कोरोनाचा प्रसार होण्याची भीती असल्याने गृह विभागाने वेळीच सतर्कता बाळगून कार्यक्रमास दिलेल्या परवानगीचा फेरविचार केला. त्यानुसार ६ मार्च २०२० रोजी या कार्यक्रमास परवानगी नाकारण्यात आली.
तबलिगीच्या आयोजकांना हा कार्यक्रम होऊ नये याबाबत सक्त सूचना देण्यात आल्या होत्या. कोरोनाच्या पार्श्वभूमीवर गृह विभागाने वेळीच सतर्कता बाळगल्याने दिल्लीसारखी घडलेली घटना आपण राज्यात थांबवू शकलो, असे गृहमंत्री अनिल देशमुख यांनी जारी केलेल्या प्रसिद्धी पत्रकात म्हटले आहे.
