मुंबई - औरंगाबाद नामांतराचा मुद्दा सध्या तापलेला आहे. सर्व राजकीय पक्ष आपली वेगवेगळी भूमिका मांडताना दिसत आहेत. यातच वंचित बहुजन आघाडीचे अध्यक्ष अ‌ॅड. प्रकाश आंबेडकर यांनीही या विषयात उडी घेत पुणे जिल्ह्याच्या नामांतराची मागणी केली आहे. संभाजी महाराजांचे नाव पुण्याला द्यावे, अशी मागणी केली आहे.
औरंगाबादच्या नामांतरावरून सर्वसामान्य जनतेच्या भावनेशी खेळ करण्याचा प्रकार सध्या सुरू आहे. औरंगाबाद आणि संभाजी महाराज असा काही संबंध नाही. संभाजी महाराजांची समाधी पुण्यात आहे. त्यामुळे संभाजी महाराजांचे नाव द्यायचे असेल तर पुणे जिल्ह्याला द्यावे, अशी थेट मागणी प्रकाश आंबेडकर यांनी केली आहे.
सेना-भाजप सत्तेत असताना नामांतर का नाही..?
औरंगाबाद महानगरपालिकाच्या निवडणुका आहेत म्हणून हा नामांतराचा मुद्दा चर्चेत आला आहे. जेव्हा शिवसेना आणि भारतीय जनता पक्षाचे सरकार होते तेव्हा नावात बदल का केला नाही?, असा प्रश्न ही त्यांनी शिवसेना आणि भारतीय जनता पक्षाला केला आहे.
चंद्रकांत पाटील 'तेव्हा' झोपले होते का
भाजप नेते चंद्रकांत पाटील आता औरंगाबाद नामांतराबद्दल बोलत आहेत. जेव्हा त्यांचा पक्ष सत्तेत होता तेव्हा ते झोपले होते का ? अशी टीका देखील आंबेडकर यांनी पाटील यांच्यावर केली आहे.
राष्ट्रवादीनेही आपली भूमिका स्पष्ट करावी
काँग्रेस, शिवसेनेने नामांतराबद्दल आपली भूमिका स्पष्ट केली आहे. मात्र, महाविकास आघाडीत असलेला त्यांचा मित्रपक्ष राष्ट्रवादी काँग्रेसने देखील नामांतराबद्दल आपली भूमिका स्पष्ट केली पाहिजे, असे ही प्रकाश आंबेडकर यांनी म्हटलं आहे.
नवी मुंबई विमानतळाच्या नामकरणाबाबत सरकार स्थनिकांच्या भावनांचा विचार करेल
नवी मुंबई विमानतळाच्या नामकरणाबद्दल देखील वाद सुरू आहे. याबाबत बोलताना आंबेडकर म्हणाले, सरकार स्थानिकांच्या भावनांचा विचार करेल, अशी अपेक्षा आहे.
हेही वाचा - शिवसेनेचा भगवा आता हिरवा झाला आहे का? - सोमैया
हेही वाचा - विनापरवाना बांधकाम प्रकरणी दिवाणी न्यायालयाचा कंगनाला झटका
