मुंबई - मुंबईत कोरोनाचा प्रादुर्भाव असल्याने मास्क लावा, रस्त्यावर थुंकू नका, असे आवाहन महापालिकेकडून वारंवार केले जात आहे. मात्र, त्यानंतरही 60 ते 70 टक्के मुंबईकर मास्क वापरताना दिसत नाहीत. या मुंबईकरांना शिस्त लावण्यासाठी महापालिकेने मुंबई आणि वाहतूक पोलिसांचीही मदत घेतली आहे. त्यानंतर आता पालिका आयुक्तांच्या आदेशाने मास्क ना लावणाऱ्यांविरोधातील कारवाई कडक करण्यासाठी महापालिकेने क्लीनअप मार्शलची नियुक्ती केली आहे.
मुंबईमध्ये मार्चपासून कोरोनाचा प्रादुर्भाव आहे. कोरोनाचा प्रसार रोखण्यासाठी पालिकेने मास्क वापरा, हात वारंवार धुवा, गर्दीत जाण्याचे टाळा, कोरोनाची लक्षणे नसल्यास त्वरित उपचार करून घ्या, असे आवाहन पालिकेने केले आहे. मुंबईकरांना मास्क लावण्याची सवय लावता यावी म्हणून पालिकेने मास्क न लावल्यास एक हजार रुपये दंड बसवला होता. टाळेबंदीनंतर मिशन बिगिन अंतर्गत मुंबईमधील व्यवहार टप्प्याटप्याने सुरू केले जात आहेत. यामुळे पालिकेने दंडाची रक्कम कमी करत 200 रुपये इतकी केली आहे. महापालिकेने आतापर्यंत 40 हजार नागरिकांवर कारवाई करत 1 कोटी 5 लाख रुपये इतका दंड वसूल केला आहे.
नुकतीच पालिकेचे अतिरिक्त आयुक्त सुरेश काकाणी यांनी मुंबईच्या काही विभागात भेट दिली. या भेटी दरम्यान 60 ते 70 टक्के मुंबईकर आजही मास्क वापरत नसल्याचे त्यांच्या निदर्शनास आले. यामुळे पालिकेने दंडाची रक्कम दुप्पट म्हणजेच 400 रुपये इतकी करण्याचा निर्णय घेतला आहे. मास्क न लावणाऱ्यांविरोधात दंड वसूल करण्यासाठी मुंबई पोलीस आणि वाहतूक पोलिसांची मदत घेतली जात आहे. मुंबईकरांना वारंवार आवाहन करूनही मास्क वापरले जात नसल्याने महापालिकेने आता क्लीनअप मार्शलची नियुक्ती केली आहे. मुंबईच्या 24 विभाग कार्यालयाला दिलेल्या आदेशानुसार 500 हून अधिक क्लीनअप मार्शल मुंबईत नियुक्त करण्यात आले आहेत.
जनजागृती आणि कारवाई
मुंबई महापालिका कर्मचारी आणि क्लीनअप मार्शलच्या माध्यमातून मास्क लावण्याबाबत जनजागृती केली जात आहे. जे नागरिक मास्क वापरत नाहीत, अशा नागरिकांकडून दंड वसूल केला जात आहे. मुंबई महापालिकेच्या 24 विभाग कार्यालयांना पालिका आयुक्त इकबाल सिंह चहल यांनी मास्क ना लावणाऱ्याविरोधात कारवाई कडक करण्याचे आदेश दिले आहेत. त्यानुसार मुंबईत 500 पेक्षा अधिक क्लीनअप मार्शल नियुक्त केले आहेत, अशी माहिती पालिकेचे घनकचरा व्यवस्थापन विभागाचे वरिष्ठ अधिकारी असलेल्या अशोक यमगर यांनी दिली.
मुंबईत पहिला गुन्हा दाखल
आचार्य मार्ग येथे बुधवारी (दि. 14 ऑक्टोबर) दुपारी दीड वाजण्याच्या सुमारास एका व्यक्तीला मास्क न घातल्याने पालिकेच्या कर्मचाऱ्यांनी विचारणा केली. यावेळी कर्मचाऱ्यांनी पालिका कर्मचारी आणि पोलिसांसोबत हुज्जत घातली. त्या व्यक्तीला गोवंडी पोलीस ठाण्यात नेण्यात आले. राहुल मधुकर वानखडे (रा. न्यु गौतम नगर गोवंडी), असे या नागरिकाचे नाव आहे. या व्यक्तिविरोधात सरकारी कामात अडथळा आणल्या प्रकरणी भारतीय दंड विधानाच्या कलम 188, 186, 269 नुसार गुन्हा दाखल करण्यात आला आहे.
दंडाची रक्कमही वाढवली
मुंबईत मार्चपासून कोरोनाचा प्रादुर्भाव कायम आहे. कोरोनाचा प्रसार रोखण्यासाठी पालिकेकडून सातत्याने जनजागृती करण्यात येत आहे. नागरिकांचा कोरोनापासून बचाव व्हावा, म्हणून मास्क न घालणाऱ्यांविरोधात पालिकेने 1 हजार रुपये दंड वसूल केला आहे. मिशन बिगीन अंतर्गत सर्व व्यवहार सुरळीत होत असताना हा दंड 200 रुपये इतका कमी करण्यात आला आहे. मात्र, मास्क वापरण्याकडे दुर्लक्ष केले जात असल्याने पालिकेने दंडाची रक्कम 400 रुपये करण्याचा तसेच पोलिसांनाही कारवाईचे अधिकार दिले आहेत.
हेही वाचा - गिरगावातील 92 एलआयसी इमारतीतील रहिवाशांचा जीव धोक्यात; अरविंद सावंतांचा केंद्र सरकारवर उदासीनतेचा ठपका
