मुंबई- संपूर्ण देशाचे लक्ष लागलेल्या दिल्ली विधानसभा निवडणुकीतील निकालाचे चित्र जवळपास आम आदमी पार्टीच्या बाजूने असल्याचे स्पष्ट झाले आहे. ६० पेक्षा जास्त जागांवर आपच्या उमेदवारांनी विजय मिळवला आहे. ज्या प्रमाणे दिल्लीत आपची जादू कायम आहे, तशीच जादू यावेळी महाराष्ट्रात होईल. औरंगाबाद महानगरपालिका आणि दोन वर्षांनी होणाऱ्या मुंबईतील महानगरपालिकाच्या निवडणुकीतून आप महाराष्ट्राच्या राजकारणात प्रवेश करेल. आता काँग्रेस, शिवसेना, भाजप यांनी सतर्क राहावे, असा इशारा आम आदमी पक्षाच्या कार्यकर्त्यांनी दिला आहे.
हेही वाचा- काँग्रेसने मागील निवडणुकांमधून काहीच धडा घेतला नाही, जगदीश शर्मांचा पक्षाला घरचा आहेर..
आम आदमी पक्षाच्या दिल्ली विधानसभेत झालेल्या विजयामुळे महाराष्ट्रातील आप कार्यकर्त्यांमध्ये नवचैतन्य निर्माण झाले आहे. महाराष्ट्र होऊ घातलेल्या औरंगाबाद महानगरपालिका निवडणुकीत आम आदमी पक्ष आपले 115 उमेदवार उभे करणार आहे. याबरोबरच, मुंबईतील महानगरपालिका निवडणुकीतही आप पूर्ण ताकदीने उतरणार आहे. महाराष्ट्रात याअगोदर यश मिळाले नसले, तरी येणाऱ्या पालिका निवडणुकीच्या माध्यमातून आमचा पक्ष महाराष्ट्रात प्रवेश करेल, असा विश्वास आम आदमी पार्टीच्या अनिल वर्मा यांनी व्यक्त केला आहे.
भारतीय जनता पार्टीने पूर्ण ताकद लावली असतानाही आमच्या पक्षाने केलेल्या विकास कामाच्या जोरावर पुन्हा एकदा दिल्ली काबीज केली आहे. आम्ही राबवलेले 'विकास मॉडल' महाराष्ट्र सरकार राबवताना दिसत आहे. येणाऱ्या पालिका निवडणुकीत आम्ही मूलभूत सुविधांना प्राधान्य देत निवडणूक लढवणार आहोत. 'आप'चा झेंडा मुंबई आणि औरंगाबाद पालिकेच्या मुख्यालयावर फडकवणार आहोत, असे पक्षाचे प्रवक्ते सुग्रीव मुंडे यांनी सांगितले.
