लातूर - शिरुरताजबंद ते हाडोळती मार्गावरील हिप्पळगाव (ता. अहमदपूर) पाटी येथे कार पलटी होऊन अपघात झाला. या अपघातामध्ये २ महिलांचा मृत्यू झाला आहे. तर चालक गंभीर जखमी झाला आहे. समोरून येणाऱ्या ट्रॅक्टरला हुलकावणी देताना कार पलटी होऊन हा अपघात झाला. मंगळवारी दुपारी ४ वाजण्याच्या सुमारास ही घटना घडली.
अपघातात कलावती गणपत शिंदे (वय ४५, मंडलापूर, मुखेड तालुका), संध्या जाधव (वय ४२, रा. भुतन हिप्परगा, ता. देगलूर) या दोन महिलांचा मृत्यू झाला आहे. तर चालक जावेद शेख (वय २५ रा. बार्शी) हा गंभीर जखमी झाला आहे. हे तिघेजण बार्शीहून विवाह सोहळ्यासाठी काटेवाडी (ता. देगलूर) येथे जात होते. हिप्पळगाव येथील वळणावर अचानक समोर ट्रॅक्टर आल्याने कारचालकाचा ताबा सुटला आणि कार (एम.एच. १३ सी.एस.४००४) पलटी झाली.
कारमधील कलावती शिंदे ही महिला जाग्यावरच ठार झाली तर संध्या जाधव यांचा उपचारासाठी लातूर येथे घेऊन जाताना मृत्यू झाला. तर चालक जावेद शेखला लातूरमधील रुग्णालयात दाखल करण्यात आले असून त्याच्यावर उपचार सुरु आहेत.