कोल्हापूर; भक्तांविना पार पडला जोतिबाचा पहिला खेटा

कोरोनाच्या वाढत्या प्रसारामुळे श्री जोतिबा खेटेचे आयोजन करण्यात येऊ नये, असे आदेश जिल्हाधिकारी दौलत देसाई यांनी दिले होते. जरी आयोजन करण्यात आले तरी मर्यादित लोकांच्याच उपस्थितीत हे खेटे पार पाडण्यात यावेत, अशा सूचनाही देण्यात आल्या होत्या.

कोल्हापूर- जोतिबाच्या नावानं चांगभलं, अशी भक्तांच्या गर्द हाकेने दरवर्षी रत्नागिरीचा डोंगर दुमदुमून जातो. मात्र, यंदा पहिल्यांदाच जोतिबाचा पहिला खेटा भक्तांविना पार पडला. कोरोनामुळे जिल्हाधिकाऱ्यांनी जोतिबाच्या उत्सवावर बंदी घातल्यानंतर हे चित्र पाहायला मिळाले. तसेच मंदिर परिसरात गर्दी होऊ नये, यासाठी डोंगर पायथ्याला पोलीस बंदोबस्त तैनात करण्यात आला होता.

मर्यादित लोकांच्या उपस्थित पार पडला खेटादरवर्षी श्री क्षेत्र वाडीरत्नागिरी येथे होणाऱ्या श्री जोतिबा खेटे कार्यक्रमावेळी जोतिबा डोंगरावर भाविकांची मोठ्या प्रमाणावर गर्दी होत असते. त्याप्रमाणे यंदाही २८ फेब्रुवारी रोजीपासून पुढील चार रविवार श्री जोतिबा खेटे कार्यक्रमावेळी भाविकांची क्षेत्र वाडीरत्नागिरी येथे मोठ्या प्रमाणावर गर्दी होण्याची शक्यता होती. कोरोनाच्या वाढत्या प्रसारामुळे श्री जोतिबा खेटेचे आयोजन करण्यात येऊ नये, असे आदेश जिल्हाधिकारी दौलत देसाई यांनी दिले होते. जरी आयोजन करण्यात आले तरी मर्यादित लोकांच्याच उपस्थितीत हे खेटे पार पाडण्यात यावेत, अशा सूचनाही देण्यात आल्या होत्या. त्यानुसार जोतिबाचा पहिला खेटा पार पडला. यावेळी ठराविक लोकांनाच मंदिरात जाण्याची परवानगी देण्यात आली होती. तसेच मंदिराच्या पायथ्याशी मोठा पोलीस बंदोबस्त तैनात करण्यात आला होता. त्यानंतर पुढील चार खेटे दिवशी मंदिर बंद ठेवण्यात आले आहे.