कोल्हापूर- राष्ट्रवादी काँग्रेसचे नेते आमदार हसन मुश्रीफ यांच्या घरावर प्राप्तिकर विभागाने छापा टाकल्यानंतर मुश्रीफ समर्थक मोठ्या प्रमाणावर घरासमोर जमले आहेत. सकाळपासूनच कागलमध्ये मुश्रीफ समर्थकांची गर्दी झाली. यामध्ये महिलांचा देखील समावेश आहे. हसन मुश्रीफ आमचे देव आहेत गोरगरिबांची काम करतात, असे म्हणत महिलांनी भाजप विरोधात जोरदार घोषणाबाजी केली.
हसन मुश्रीफ यांनी अधिकाऱ्यांनी दिलेल्या परवानगी नंतर सायंकाळी घराबाहेर येऊन कार्यकर्त्यांना शांत करत सर्वांना आपल्या घरी जाण्याचे आवाहन केले. तुमच्या बाहेर सुरू असलेल्या घोषणांमुळे आलेले अधिकारी घाबरले असल्याचेही त्यांनी यावेळी म्हटले आहे. ते त्यांची जबाबदारी पार पाडत आहेत आणि आपण त्यांना संपूर्ण माहिती देणे ही आपली जबाबदारी आहे, असे मुश्रीफ म्हणाले.
कोणीही घाबरून जाऊ नये ते आपले काम करून उद्या निघून जातील, असेही मुश्रीफ यांनी आपल्या समर्थकांना सांगितले. सकाळपासून मुश्रीफ यांना अधिकाऱ्यांनी घराबाहेर जाण्याची परवानगी दिली नव्हती आणि कोणत्याही कार्यकर्त्याला घरामध्ये जाऊ सुद्धा दिले नव्हते. सायंकाळी मुश्रीफ यांना काही वेळ बाहेर जाण्याची परवानगी दिली यावेळी मुश्रीफ यांनी कार्यकर्त्यांना शांत राहण्याचे आवाहन केले.