कोल्हापूर - काँग्रेसचे आमदार सतेज पाटील यांच्या घरासमोर चक्क भानामतीचा प्रकार घडला आहे. अमावस्याच्या रात्री घरासमोर असलेल्या झाडाला पांढऱ्या कापडामध्ये गुंडाळलेली काळी बाहुली दिसून आल्याने सर्वत्र एकच चर्चा पाहायला मिळत आहे. त्यांच्या घरासमोर आठ दिवसांमध्ये दुसऱ्यांदा अशा प्रकारची घटना घडल्याने सर्वत्र खळबळ उडाली आहे.
कोल्हापुरातील कसबा बावड्यामधील यशवंत निवास येथे काँग्रेसचे आमदार सतेज पाटील हे राहतात. मात्र, गेल्या काही दिवसांपासून घरासमोर अनोळखी व्यक्तीकडून भानमतीचे प्रकार घडत असल्याचे समोर आले आहे. सतेज पाटील यांच्या घरासमोरील याच झाडावर गेल्या आठवड्यापासून दोन वेळा पांढऱ्या कपड्यात हळदी, कुंकू लावलेली बाहुली बांधून ठेवल्याचे आढळले होते.
हा प्रकार होऊन चार दिवस उलटत नाहीत तोपर्यंत दुसऱ्यांदा अमावस्येच्याच मध्यरात्री हा प्रकार घडला. आगामी लोकसभा निवडणुकीच्या तोंडावर काळ्या जादूवर विश्वास ठेऊन काही ना काही करण्याचा उद्योग पाहायला मिळतो. यापूर्वीच्या अनेक निवडणुकीमध्येही अशा प्रकारच्या काळ्या जादूचा काही उमेदवारांनी अवलंब केल्याचे यापूर्वी अनेकदा समोर आले आहे. मात्र, आता चक्क आमदार सतेज पाटील यांच्याच घरासमोर अशा प्रकारच्या भानामतीचा प्रकार समोर आल्याने विविध चर्चांना ऊत आला आहे.
त्यानंतर तात्काळ त्यांच्या घराच्या परिसरात सीसीटीव्ही बसविण्यात येणार आहेत. या घटनेनंतर स्थानिक नागरिकांतून संताप व्यक्त केला जात आहे.
