कोल्हापूर - कोरोना महामारीला प्रतिबंध करण्यासाठी लॉकडाऊन करण्यात आलेली राज्यातील मंदिरे लवकरच अनलाॅक होण्याचे संकेत आहेत. त्या पार्श्वभूमीवर साडेतीन पीठांपैकी एक पूर्ण पीठ असलेल्या कोल्हापूरातील श्री अंबाबाई मंदिरात देवीच्या दर्शनासाठी नियमावली तयार करण्यात आली आहे. या नियमावलीत राहूनच भक्तांना देवीचे दर्शन मिळणार आहे. मंदिर खुले झाले तरी, मंदिराच्या चारही दरवाजातून ये-जा राहणार नाही. भक्तांसाठी केवळ एकच दरवाजा खुला ठेवला जाईल. भक्तांच्या संख्येवरही मर्यादा असेल, त्यासाठी शासनाने घातलेल्या सर्व अटी नियमांचे पालन केले जाईल. तथापि, राज्य शासनाने परवानगी दिल्यानंतर मंदिर सुरू करण्यात येईल, असे पश्चिम महाराष्ट्र देवस्थान समिती अध्यक्ष महेश जाधव यांनी सांगितले.
कोरोना रुग्णांची वाढणारी संख्या आणि राज्यातील बिकट परिस्थिती यामुळे महाराष्ट्र शासनाने अद्याप मंदिरे अनलाॅक केलेली नाहीत. पण मुंबईत नुकत्याच झालेल्या कोविड टास्क फोर्स बैठकीत येत्या तीन ते चार दिवसांत मर्यादित क्षमतेने मंदिर आणि रेस्टॉरंट सुरू करण्यावर चर्चा झाली आहे. त्यामुळे राज्यातील मंदिरे लवकरच अनलाॅक होतील असे संकेत आहेत. साडेतीन शक्तिपीठांपैकी पूर्ण पीठ असलेल्या करवीर निवासिनी अंबाबाई (महालक्ष्मी) मंदिरात वर्षातील सर्वात मोठ्या उत्सवाची म्हणजेच शारदीय नवरात्रोत्सवाची तयारी सुरू झाली आहे.
अद्याप महिन्याचा कालावधी असला तरी, सहा महिन्यांनी मंदिर खुले झाल्यानंतर भक्तांसाठीची नियमावली देवस्थान समितीने तयार केली आहे. दर्शनासाठी मंदिरात प्रवेश करणाऱ्या भक्तांना मास्कची सक्ती असेल. आत प्रवेश करणाऱ्या सर्वांचे थर्मल टेस्टिंग केले जाईल. सॅनिटायझरचा वापर केला जाईल. मंदिरात पूजेसाठी घेऊन जाणाऱ्या खण, ओटी साहित्यावरही निर्बंध असतील. कोविड रुग्णांची वाढती संख्या लक्षात घेता सुरुवातीचे काही दिवस भक्तांना थेट गाभाऱ्यात प्रवेश न देता पितळी उंबऱ्यापासून दर्शन देण्याचाही देवस्थान समितीचा विचार सुरू आहे.
नवरात्रोत्सव उत्साहातच पण -
देवीचा शारदीय नवरात्रोत्सव उत्साहातच साजरा होणार. नऊ दिवस देवीची विविध रुपात पूजा बांधली जाईल, नवरात्रोत्सवातील परंपरेनुसार पूजा व सर्व धार्मिक विधी होतील. पण, कोणत्याही प्रकारे मंदिरात किंवा मंदिर परिसरात गर्दी होणार नाही, याची खबरदारी देवस्थान समितीकडून घेतली जाईल, असे देवस्थान समिती अध्यक्ष महेश जाधव यांनी ईटीव्ही भारतशी बोलताना सांगितले.
अशी असेल नियमावली
- दर्शनासाठी येणाऱ्या भक्तांच्या संख्येवर राहणार मर्यादा
- खण, ओटी, पूजा साहित्यावर निर्बंध
- पितळी उबऱ्यापासून दर्शनाचा विचार
- भक्तांना मास्कची सक्ती असेल
- आत प्रवेश करणाऱ्या सर्वांचे थर्मल टेस्टिंग
- सॅनिटायझरचा वापर अनिवार्य
