जालना - परतीच्या पावसाने नुकसान झालेल्या शेतकऱ्यांचे अर्ज स्वीकारण्यासाठी प्रशासनाने विमा कंपन्यांना सांगितले आहे. मात्र, तरी देखील विमा कंपन्या सरकारच्या निर्देशांना जुमानत नसल्याचे चित्र दिसत आहे. बदनापूर येथे विमा कंपनीचे कर्मचारी आज कार्यालय बंद करून बेपत्ता झाले. त्यामुळे पीक विम्याचा क्लेम दाखल करण्यासाठी आलेल्या ५०० ते ८०० शेतकऱ्यांना ताटकळत बसावे लागले. ६ नोव्हेंबरला पीक विमा कंपनी बंद आढळल्यास तीव्र आंदोलन करू, असा इशारा छावा क्रांतिवीर सेनेकडून देण्यात आला आहे.
तालुक्यातील शेतकरी परतीच्या पावसाने हवालदिल झाले आहे. प्रशासनाने सर्व ठिकाणी पंचनामे सुरू केले असून पीक विमा भरलेल्या शेतकऱ्यांना क्लेमसाठी अर्ज दाखल करावे, असे आवाहन केले होते. बदनापूर येथे बजाज आलियान्स या पीक विमा कंपनीचे कार्यालय आहे. येथील कर्मचारी आज कार्यालय बंद करून गायब झाले होते. सकाळपासून सुमारे ५०० ते ८०० शेतकरी या कार्यालयासमोर भर उन्हात पीक विमा अर्ज भरण्याकरता उभे होते. ४ तास उलटूनही कोणताच कर्मचारी पीक विमा कार्यालयाकडे फिरकला नाही.
त्यामुळे शेतकऱ्यांनी छावा क्रांतिवीर सेनेचे शेतकरी आघाडीचे प्रदेशाध्यक्ष पंकज जऱ्हाड यांच्यासोबत तहसील कार्यालय गाठले. तहसील कार्यालयात ठिय्या मांडल्यानंतर तालुका कृषी अधिकाऱ्यांनी आपले कर्मचारी पाठवून शेतकऱ्यांचे अर्ज घ्यायला लावले. मात्र, विमा कंपनीचे कर्मचारी प्रशासनास जुमानत नसल्याचेच चित्र येथे दिसून आले. दरम्यान, ६ नोव्हेंबरला पीक विमा कंपनी कार्यालय बंद आढळल्यास हजारो शेतकऱ्यांसह रस्त्यावर उतरून उग्र अंदोलन करण्यात येईल, असा इशारा छावा क्रांतिवीर सेनेच्या वतीने देण्यात आला आहे.
हेही वाचा- जालन्यात नवीन इमारतीसाठी पोलीस प्रशासन नरबळीच्या प्रतीक्षेत?
