जालना - बुधवारी पहाटे ४ वाजण्याच्या सुमारास ही घटना घडली. दरम्यान, ग्रामस्थांनी ३ कुत्र्यांना कोंडून ठार मारले, तर यातील एक कुत्रा पळून गेला आहे.
शरद रामकिसन शेजुळ (खरपुडी) यांचे गावापासून जवळच शेत आहे. या शेतामध्ये शेळ्यांसाठी त्यांनी शेड तयार केले आहे. या शेडच्या चारही बाजूने तारांचे संरक्षक कुंपण आहे. या कुंपणामध्ये शेळ्यांसाठी आणखी एक कुंपण घातले आहे. हे दोन्ही कुंपण तोडून ४ रानटी कुत्र्यांनी आत प्रवेश करून शेळ्यांच्या नरडीला चावा घेतला, काहींचे पाय तोडले त्यामुळे शेळ्या ओरडू लागल्या, त्या दरम्यान शेळ्यांचा आवाज ऐकून बाजूला असलेल्या शेजुळ यांच्या नातेवाईकांनी शेडकडे धाव घेतली. त्यावेळी ही ४ कुत्री शेळ्यांना चावा घेताना दिसली. त्यावेळी कुत्र्यांची संख्या पाहता सहकाऱ्यांनी दार बंद करून कुत्र्यांना आतमध्ये कोंडले.
यानंतर ग्रामस्थ त्या कुत्र्यांना मारण्याचा प्रयत्न करत होते. मात्र, ही कुत्री ग्रामस्थांच्या अंगावर धावून येत होती. शेवटी त्यांना विजेचा शॉक देऊन मारावे लागले. यातील ४ कुत्र्यांपैकी ३ कुत्र्यांना ठार मारण्यात आले असून एक कुत्रा पळून गेला आहे. मागील १५ दिवसांमध्ये या परिसरातील गाईंची वासरे, शेळ्या, लहान जनावरे, अशा १५ जनावरांना या कुत्र्यांनी मारले. इतर जनावरांचे कान तोडणे, पायाला चावा घेणे, अशा प्रकारच्या सुमारे ५० जनावरांना या रानटी कुत्र्यांनी जखमी केले. या कुत्र्यांची परिसरात दहशत वाढल्यामुळे शेतकऱ्यांमध्ये भीती पसरली आहे, त्यामुळे वन विभागाच्या अधिकाऱ्यांनी यांचा बंदोबस्त करावा, अशी मागणी शेतकऱ्यांनी केली आहे.
