हिंगोली - महिला या खरोखर खूपच व्यवहारिक असतात, मुख्य म्हणजे महिला जिद्दी अन कष्टाळू असतात. हेच दाखवून दिलं आहे हिंगोली तालुक्यातील अंधरवाडी येथील बचत गटांच्या महिलांनी. या बचत गटांमध्ये पंचावन्न महिला आहेत. त्यांना व्यवसायाची संधी उपलब्ध करून दिली आहे ती धान कलंजीयम फाउंडेशनने. या महिलांनी नेमकं काय केले? त्यांनी आपला व्यवसाय कसा यशस्वी केला पाहूयात स्पेशल रिपोर्ट.
सध्याच्या परिस्थितीत महिला व पुरुषांच्या हाताला कामच नसल्याने, बऱ्याच खेड्यापाड्यातील महिला या कामाच्या शोधात बाहेर जिल्ह्यात जात असतात. कोणी ऊसतोडीसाठी तर कोणी हळद काढणीसाठी स्थलांतर करतात. मात्र गेल्या वर्षीपासून राज्यात कोरोनाचे सावट असल्याने अनेक महिला गावी परतल्या आहेत. गावी परतलेल्या अनेक महिलांनी बचत गटची स्थापना केली, मात्र नियोजनाचा अभाव, योग्य मार्गदर्शन न मिळणे, आर्थिक पाठबळ नसने अशा अनेक कारणांमुळे हे बचत गट यशस्वी होऊ शकले नाहीत. मात्र अंधरवाडी येथील महिला बचत गटांनी या सर्वांवर मात करत, कलंजियम फाऊंडेशनच्या मदतीने रोपवाटिका तयार केली आहे. या व्यवसायाच्या माध्यमातून महिलांनी गरुडझेप घेतल्याचे पाहायला मिळत आहे.
पॉलिहाऊसच्या निर्मितीसाठी 42 लाख 89 हजारांचा खर्च
महिलांचे पाच गट मिळून फुल उत्पादक कलंजियम महिला महासंघाची स्थापना करण्यात आली आहे. या महिलांना रोपवाटिका निर्मिती आणि फुल उत्पादनासाठी अवश्यक असणारे पॉलिहाऊसच्या निर्मितीसाठी, 43 लाख 89 हजारांची मदत मानव विकास मिशन हिंगोली, महिला आर्थिक विकास आणि धान फाउंडेशनच्या वतीने करण्यात आली.
22 गुंठे क्षेत्रावर गुलाबाची लागवड
या महिलांनी एक लाख रुपये भाड्याने चार वर्षांच्या करारावर जमीन घेतली आहे. महिलांनी या जमिनीत गुलाबांच्या रोपाची लागवड केली आहे. तसेच उत्पादन खरेदीसाठी राजदीप एंटरप्राईज तळेगाव दाभाडे, पुणे या कंपनीसोबत करार केला आहे. विशेष बाब म्हणजे पॉलिहाऊस मधील बांधकाम करून, त्यात गुलाबाची लागवड ते तोडणी करण्यापर्यंतचा सर्व खर्च ही कंपनी करणार आहे. दरम्यान आता या शेतीमधून या महिलांना चांगले उत्पादन मिळत असून, महिलांनी स्व:तासाठी रोजगार शोधला आहे.
हेही वाचा - कोरोना रुग्णांत वाढ; सरकारकडून नियमावली जाहीर; संध्याकाळी 8 नंतर सार्वजनिक ठिकाणे बंद
