हिंगोली - जिल्ह्यात ३ ते ४ दिवसांपासून उष्णतेची लाट पसरली आहे. जवळपास ४२ अंश एवढे तापमान असल्याने उन्हापासून बचाव करण्यासाठी नागरिकांचा मोठा खटाटोप सुरू आहे. अशातच घरात कुलर असेल आणि ते व्यवस्थित न हाताळल्यास जीव गमावू शकतो. असेच एकाला चालू कुलरमध्ये पाणी टाकणे जीवावर बेतले. शॉक लागलेली व्यक्ती काही क्षणात जमिनीवर कोसळून पडली. त्या व्यक्तीला रुग्णालयात नेले असता डॉक्टरांनी त्यास मृत घोषित केले. ज्ञानेश्वर भाऊराव कोळपे (३५, रा. कळमनुरी) असे मृताचे नाव आहे.
हिंगोली जिल्ह्याचे तापमान ३ ते ४ दिवसांपासून ४२ अंशावर पोहोचले आहे. मे महिन्यात वाढणारा पारा एप्रिलमध्येच वाढत आहे. त्यामुळे उन्हापासून बचाव करण्यावरच सर्वाधिक जास्त भर आहे. असाच एक विश्वहिंदु परिषदेचा कार्यकर्ता दिवसभर आपले काम उरकून रात्री घरी गेला. घरात गेल्यानंतर लेकरं बाळ झोपलेले असताना काही प्रमाणात उकाडा जाणवत होता. त्यामुळे ज्ञानेश्वर कुलर जवळ गेला तर कुलरमध्ये पाणी कमी दिसले.
कुलरला शॉक बसत असल्याची पत्नीने कल्पना दिली होती. मात्र, त्याच्याकडे ज्ञानेश्वरने दुर्लक्ष करून चालू कुलरमध्येच पाणी टाकण्याचा प्रयत्न केला. यातच त्याला विजेचा धक्का लागला अन् ज्ञानेश्वर जोराने जमिनीवर कोसळला. त्यानंतर पत्नीने आरडाओरड केल्याने नागरिकांनी धावाधाव केली आणि ज्ञानेश्वरला लगेच रुग्णालयात नेले. दरम्यान, डॉक्टरांनी तपासून ज्ञानेश्वरला मृत घोषित केले.
ज्ञानेश्वर हा सामाजिक कार्यक्षेत्रात सक्रिय कार्यकर्ता होता. त्याच्या मृत्यूवर कोणाचा विश्वासच बसत नव्हता. त्यामुळे जो तो त्याची माहिती घेण्याचा प्रयत्न करत होता. दरम्यान, ज्ञानेश्वरच्या मृत्यूने जिल्ह्यात हळहळ व्यक्त होत आहे.
