हिंगोली - वन्यप्राण्यांच्या संख्या दिवसेंदिवस कमी होत चालली आहे. तसेच जैवविविधतेचा प्रश्नही मोठ्‌या प्रमाणात निर्माण होत असतानाचा रविवारी हिंगोली तालुक्यातील जामठी खुर्द परिसरात एका वन्य प्राण्याची शिकार करताना शिकारी आढळून आले. वनरक्षकांनी घटनास्थळाकडे धाव घेताच शिकाऱ्यांनी घटनास्थळावरून पळ ठोकला. प्राण्याचे मांस वनविभागाने प्रयोगशाळेत प्राण्याची ओळख पटण्यासाठी पाठवले आहे. दोन महिन्यातील ही दुसरी घटना आहे.
हेही वाचा - बैलाने लाथ मारल्याने बारा वर्षीय मुलाचा मृत्यू; मोहगाव येथील खळबळजनक घटना
रविवारी दुपारच्या वेळेस चार ते पाच शिकारी एका वन्यप्राण्याची शिकार करून मांस वेगवेगळे करत बसले होते, तर काही जण तीक्ष्ण हत्याराने मांस तोडत होते. तोच वनरक्षकांना ही गोष्ट कळताच सर्वजण पळून गेले. घटनास्थळावरून मांस, जाळे आदी साहित्य जप्त केले आहे. संबंधीत मांसाचे पशुवैद्यकीय अधिकाऱयामार्फत शेवविच्छेदन करून यातील काही मांसाचे नमुने प्रयोगशाळेकडे पाठवले जाणार आहेत. अहवालानंतरच हे नेमके कोणत्या वन्यप्राण्यांचे मांस आहे हे सिद्ध होणार असल्याचे वनाधिकारी विश्वनाथ टाक यांनी सांगितले.
हेही वाचा - हिंगोलीत खडीच्या ढिगाऱ्याखाली गुदमरून एकाचा मृत्यू
आरोपी जरी पळून गेले असतील तरी त्यांच्या दुचाकींच्या नंबरप्लेट चे फोटो काढले असून, त्याद्वारे आरोपीवर कारवाई केली जाणार असल्याचे टाक यांनी सांगितले. सद्या वन्यजीव जंगलात सर्वत्र भटकंती करत आहेत. या जीवांचे संरक्षण करण्याच्या उद्देशाने वन विभागाच्यावतीने जिल्ह्यातील जंगली भागात वनसंरक्षक तैनात केले आहेत. तसेच काही खबऱ्यांची देखील व्यवस्था केलेली आहे. त्यामुळे वन्यप्राण्यांची शिकार करणाऱ्याची अजिबात गय केली जाणार नसल्याचे विभागीय वनाधिकारी केशव वाबळे यांनी सांगितले.
हेही वाचा - हिंगोलीतून कमळाची फुले नामशेष होण्याच्या मार्गावर, विक्रेत्यांना फटका
मागील दोन महिण्यापूर्वी देखील ओंढा नागनाथ तालुक्यात अशाच एका वन्यप्राण्यांची शिकार करताना सात ते आठ जण आढळून आले होते. त्यांच्यावर वन्यजीव सरंक्षण कायद्यानुसार गुन्हा दाखल केला असून, शिक्षा सुनावण्यात आली आहे.
