हिंगोली - देशाला स्वातंत्र्य मिळून 70 वर्षांपेक्षा जास्त कालावधी झाला. मात्र, आजही अनेक गावातील स्मशानभूमीची अवस्था दयनीय आहे. सेनगाव तालुक्यातील पानकनेर गावातील स्मशानभूमीही अशाच स्थितीत आहे. त्यामुळे येथील ग्रामस्थांना अंत्यविधीसाठी मोठ्या यातना सोसाव्या लागतात. पावसाळ्यात नदीला पाणी असल्याने जाता येत नाही. त्यामुळे इच्छा नसताना देखील राष्ट्रीय महामार्गाच्या कडेला अंत्यविधी उरकण्याची वेळ ग्रामस्थांवर येऊन ठेपली आहे. मात्र, अशी परिस्थिती असताना देखील लोकप्रतिनिधी अजिबात या गंभीर बाबीकडे लक्ष देण्यास तयार नाहीत.
गावाची लोकसंख्या १४ हजार आहे. गावातील मुख्य प्रश्न सार्वजनिक स्मशानभूमीचा आहे. गावापासून अंतरावर असलेल्या स्मशानभूमीची अवस्था भयंकर झाली आहे. मृतदेह घेऊन जाताना कधीही पाय घसरुन पडू शकतो याचा काही नेम नाही. या ठिकाणी असलेल्या ओढ्याला वाहत असलेल्या पाण्यामुळे तर अंत्यविधीसाठी आलेले कित्येक वयोवृद्ध पाय घसरून पडलेले आहेत. जवळपास ७३ वर्षे उलटलेत तरी देखील ही मुख्य असलेली समस्या अजिबात सोडविण्यात आलेली नाही. दिवसेंदिवस तर हा प्रश्न एवढा गंभीर होत चालला आहे.
हेही वाचा - प्रवीण दरेकरांची विधान परिषदेच्या विरोधी पक्षनेतेपदी निवड ; 'असा' आहे त्यांचा राजकीय प्रवास
या परिसरात गवताचे प्रमाणही वाढल्याने स्मशानभूमी शोधण्यासाठी नागरिकांना कसरत करावी लागते. महिला नदीत पडतील या भीती पोटी त्यांना अंत्यविधीला येऊ दिले जात नाही. आल्याच तर नदीच्या पलीकडेच थांबवावे लागते. अंत्यविधीची तयारी नेमकी कुठे करावी तसेच स्मशानभूमी कधी कोसळेल याचा नेम नाही. रात्रीच्या वेळी अंत्यविधी करण्याची वेळ आली तर त्यावेळी गावकऱ्यांना खूप त्रास होतो. इच्छा नसतानाही महामार्गावर अंत्यविधी उरकावा लागतो. तेथेही विद्युत तारा असल्याने कधीही अपघात होऊ शकतो. या सर्व प्रकाराने भयभीत असल्याचे ग्रामस्थांनी सांगितले.
हेही वाचा - 'छत्रपती शिवाजी महाराजांच्या स्मारकामध्ये चंद्रकांत पाटलांनीच केला भ्रष्टाचार'
येथील अनेक नेत्यांनी मोठी पदे भोगलेली आहेत. शासनाच्या वतीने गावाच्या विकासासाठी लाखो रुपये खर्च करण्यात आले आहेत. ग्रामपंचायत, पंचायत समिती आणि जिल्हा परिषदे अंतर्गत स्मशानभूमीची समस्या दूर करण्याची गरज होती. मात्र, तसे अजिबात झालेले नाही. मात्र, त्या पैशातून स्मशानभूमीची समस्या दूर करण्याचा विचारही या नेत्यांच्या मनात आला नाही.
