गोंदिया - जिल्ह्यातील तिरोडा-तुमसर मार्गावर गुरूवारी संध्याकाळी ट्रक आणि दुचाकीमध्ये जोराची धडक झाली. यात दुचाकीचालकाचा जागीच मृत्यू झाला. सेवक बदने (४०) असे मृत्यू पावलेल्या दुचाकीचालकाचे नाव आहे. या घटनेनंतर संतप्त ग्रामस्थांनी ट्रकला आग लावली.
हेही वाचा... चीन, रशिया अन् इराणमध्ये होणार संयुक्त नौदल सराव
मागील एक वर्षापासून तुमसर-गोंदिया या राज्य महामार्गाचे काम सुरू आहे. कासव गतीने सुरु असलेल्या या रस्त्याच्या कामकाजामुळे येथे सातत्याने लहानमोठे अपघात घडत असतात. रस्त्याचे काम चालू असल्याने धुळीचे प्रमाण अधिक आहे, त्यामुळे डोळ्यात धूळ गेल्याने दुचाकीचालकालाही कधीकधी समोरचा रस्ता दिसत नाही. तसेच काम सुरु असूनही मोठ मोठे वाहने लहान वाहनचालकांनी पुढे जाण्यासाठी रस्ता देत नाहीत. त्यामुळे असे अनेक अपघात होतात. मात्र, तरीही प्रशासन त्याकडे दुर्लक्ष करत आहे.
हेही वाचा... एल्गार परिषद प्रकरण : पुणे पोलीस 'एफबीआय'ची मदत घेण्याची शक्यता
गुरूवारी देखील रात्री सेवक बदने यांचा या ठिकाणी रस्ते अपघातात मृत्यू झाला. यानंतर संतप्त ग्रामस्थांनी आपला रोष व्यक्त करत ज्या ट्रकमुळे अपघात झाला, त्या ट्रकला आग लावली. थोड्यावेळाने पोलीस घटनास्थळी आल्यावर त्यांनी गावकऱ्यांना तेथून बाजूला केले. तसेच सेवक बदने यांचा मृतदेह शवविच्छेदनासाठी तिरोडा येथील रुग्णालयात पाठवण्यात आला. यानंतर तिरोडा पोलीस स्टेशनमध्ये ट्रक चालकाविरुध्द गुन्हा दाखल करण्यात आला आहे.
हेही वाचा... अन्न व नागरी पुरवठा कार्यालयाच्या कामात 'एजंटगिरी'चा सुळसुळाट
