गोंदिया : जिल्ह्यात झालेल्या महापुरामुळे अनेकांची घरे पडली. शेतकऱ्यांचे मोठे नुकसान झाले. या पूरग्रस्त भागाची पाहणी करण्यासाठी केंद्रीय पथक आज (रविवार) जिल्ह्यात दाखल झाले आहे. त्यांनी गोंदिया तालुक्यातील अनेक गावांची पाहणी करत शेतकऱ्यांशी संवाद साधला. तसेच, नुकसानभरपाईचे आश्वासन दिले.
जिल्ह्यात दहा दिवसांपूर्वी महापूर आला असून या पुरामुळे अनेक गावे, शेती पुराच्या पाण्यात वेढली गेली होती. त्यामुळे अनेक घरे, गोठे व शेतीचे मोठ्या प्रमाणात नुकसान झाले आहे. या पूरग्रस्त भागाची पाहणी करण्यासाठी केंद्रीय पथक जिल्ह्यात दाखल झाले. या पथकाने गोंदिया तालुक्यातील जिरुटोला, बिरसोल, कासा, पुजारीटोला, ब्राम्हणटोला, या गावांमध्ये पाहणी केली. शेतकऱ्यांशी संवाद साधत त्यांना दिलासा दिला. उद्या नागपूर येथे आयुक्तांसोबत बैठक होणार आहे. नुकसानभरपाई लवकरात लवकरत देण्यात येणार असल्याचे केंद्रीय पथकमध्ये आलेले डॉ. आर. पी. सिंग यांनी शेतकऱ्यांना आश्वासन दिले.
आज आलेल्या केंद्रीय पथकाला कासा या गावातील गावकऱ्यांनी रस्त्यावरच थांबवत झालेल्या नुकसानाची माहिती दिली. तसेच एक एकराप्रमाणे ५० हजार रुपये शासनाने शेतकऱ्याला मदत दिली पाहिजे व शेतीसाठी घेतलेले कर्जही माफ करण्यात यावे. त्याचप्रमाणे कोरोनाकाळात आलेले वीजबिलसह २४ तास वीज पुरवठा शेतकऱ्यांना मिळावा, अशी मागणीही त्यांनी केली.
हेही वाचा - धक्कादायक... गोंदिया जिल्हा बँकेच्या चिचगड शाखेत तब्बल ७७ लाखांची अफरातफर
