गडचिरोली - संपूर्ण महाराष्ट्रात राज्य परिवहन महामंडळ आणि 'बस फॉर अस' फाउंडेशनच्यावतीने मुंबई ते हेमलकसापर्यंत 'वारी लालपरीची' हा उपक्रम सुरू होता. महामंडळाच्या या उपक्रमाचा समारोप आज (दि.२०) ला हेमलकसा येथे झाला. लोकबिरादरी दवाखान्याचे संचालक डॉ. दिगंत आमटे यांनी या बसचे हेमलकसा येथे स्वागत केले.
'वारी लालपरीची' चित्ररथ प्रदर्शनाचा हेमलकसा येथे समारोप 'बस फॉर अस' फाउंडेशन व राज्य परिवहन महामंडळयांच्या संयुक्त विद्यमाने 'वारी लालपरीची' चित्ररथ प्रदर्शनाची सुरुवात १ जून २०१९ रोजी मुंबई येथून झाली. संपूर्ण महाराष्ट्रात ठिकठिकाणी या चित्ररथाचे प्रदर्शन झाले. १९४८ पासून २०१९ पर्यंत एसटी बसचा इतिहास व वाटचालीची माहिती महाराष्ट्रातील विद्यार्थी व नागरिकांपर्यंत पोहचवण्याचे कार्य या उपक्रमाद्वारे करण्यात आले.लोकबिरादरी प्रकल्प हेमलकसा येथे आज शेवटचे प्रदर्शन सकाळी १० ते सायंकाळी ६ वाजेपर्यंत पार पडले. या प्रदर्शनामध्ये पहिल्या एसटी बसपासून नविन एसटी बसचे चित्र, प्रवाशांचा प्रवास सुखकर होण्यासाठी एसटी बसने आत्तापर्यंत केलेल्या विविध बदलांची माहिती उपस्थित विद्यार्थी व परिसरातील नागरिकांना करून देण्यात आली.प्रदर्शन पाहण्यासाठी भामरागड येथील सर्व शाळा, महाविद्यालये तसेच जिल्हा परिषदेच्या धोडराज, मेडपल्ली, कोयनगुडा, कुमरगुडा, हेमलकसा, टेकला, बेजूर इत्यादी शाळांतील विद्यार्थी -शिक्षक कर्मचाऱ्यांनी गर्दी केली होती.याप्रसंगी गडचिरोलीचे विभागीय नियंत्रक अशोककुमार वाडीभस्मे, आगार व्यवस्थापक मंगेश पांडे, अहेरीचे आगार व्यवस्थापक युवराज राठोड, यंत्र अभियंता एस.एस.हेडावू, अहेरी आगाराचे लेखाकार चरण चहारे, लोकबिरादरी कनिष्ठ महाविद्यालयाचे प्राचार्य डॉ. विलास तळवेकर, मुख्याध्यापक शरिफ शेख, लोकबिरादरीतील कार्यकर्ते मनोहर येम्पलवार हे उपस्थित होते.
