गडचिरोली - गडचिरोली - चिमूर लोकसभा मतदारसंघासाठी ६९ टक्के मतदान झाले. मात्र, या मतदारसंघातील अतिदुर्गम असलेल्या वाटेली, गरदेवाडा, पुष्पोटी, वांगेपुरी या ठिकाणी निवडणूक कर्मचारी मतदान घेण्यासाठी पोहचू शकले नाहीत. सुरक्षेच्या कारणामुळे या चारही बूथवर मतदान झाले नाही. त्यामुळे येथे नंतर मतदान घेण्यात येणार आहे, अशी माहिती अतिरिक्त मुख्य निवडणूक अधिकारी दिलीप शिंदे यांनी मुंबई येथे पत्रकार परिषदेत दिली.
गडचिरोली -चिमूर लोकसभा मतदारसंघात सरासरी ६९ टक्के मतदान झाल्याची प्राथमिक माहिती जिल्हाधिकारी कार्यालयातील निवडणूक शाखेतर्फे देण्यात आली आहे. आज सकाळी ७ वाजल्यापासून गडचिरोली -चिमूर लोकसभा मतदारसंघात सर्वत्र शांततेत मतदानाला सुरुवात झाली. सर्व मतदान केंद्रावर सुरुवातीला 'मॉकपोल' घेण्यात आले. तर ९५ केंद्रावर 'वेबकास्टींग' करण्यात आले.
एटापल्ली तालुक्यातील कसनसुर मौजा वागेझरी जवळ आईडी ब्लास्ट, गट्टा जांबीया गावाच्या जवळ तसेच पुरसलगोंदी गावाच्याजवळ झालेल्या भुसुरुंगाच्या स्फोटात दोन जवान जखमी झाल्याची घटना घडली. या घटना वगळता जिल्ह्यात शांततेत मतदान पार पडल्याची माहिती जिल्हाधिकारी कार्यालयातील निवडणूक शाखेमार्फत देण्यात आली.
