धुळे - शहराजवळील मुंबई आग्रा महामार्गावरील लळींग गावाजवळ बुधवारी दुपारी ट्रक आणि आयशर टॅम्पोचा भीषण अपघात झाला. या अपघातात ४ जण जागीच ठार झाले, तर अन्य ३ जण गंभीर जखमी झाले. जखमींवर धुळे जिल्हा रुग्णालयात उपचार सुरू असून या अपघातामुळे महामार्गावर काही काळ वाहतूक विस्कळीत झाली होती.
धुळे शहराजवळील मुंबई-आग्रा महामार्गावरील लळींग गावाजवळ असलेल्या लांडोर बंगल्याच्या प्रवेशद्वाराजवळ हा अपघात झाला. शिर्डीकडून धुळ्याकडे येणारा भरधाव ट्रक ( क्रमांक एमएच १८ डी ए २१९२) वरील चालकाचे वाहनावरील नियंत्रण सुटले आणि ट्रक थेट रस्त्याचा दुभाजक तोडून दुसऱ्या बाजूला घुसला. त्याचवेळी धुळ्याकडून मालेगावकडे जाणारा गोदावरी दूध संघाच्या आयशर वाहन ( क्रमांक एमएच १७ ५२६९) यावर हा ट्रक जाऊन आदळला. दुधगाडीच्या पाठोपाठ असलेल्या अॅपेरिक्षा (क्रमांक एमएच १८, डब्ल्यू ५६२९) यालाही ट्रकने जोरदार धडक दिली.
