चंद्रपूर - राज्यात २१ ऑक्टोबरला विधानसभेसाठी मतदान होणार आहे. लोकशाही बळकट करण्याकरता समाजातील प्रत्येक घटकाने मतदानात सहभाग घेणे गरजेचे आहे. यासाठी निवडणूक विभागातर्फे जनजागृती उपक्रम राबवले जात आहेत. चिमूर विधानसभा मतदारसंघात मतदान जनजागृती करण्यासाठी बस स्थानक आणि तहसील कार्यालयाच्या परिसरात सेल्फी पॉईंट तयार केले आहेत. या सेल्फी पॉईंटला नागरीकांकडून उत्स्फूर्त प्रतिसाद मिळत आहे.
जिल्हाधिकारी व जिल्हा निवडणूक निर्णय अधिकाऱ्यांच्या आदेशाप्रमाणे 'मी मतदान करणार' असा संदेश असलेले सेल्फी पॉईंट तयार केले आहेत. या सेल्फी पॉईंटचे उद्घाटन चिमूर विधानसभा निवडणूक निर्णय अधिकारी प्रकाश संकपाळ यांचे हस्ते करण्यात आले. सेल्फी पॉईंटवर फोटो काढून व्हॉट्सअॅप गृपवर एकमेकांना मतदान करण्याकरता संदेश पाठवले जात आहेत. मतदारांना जागृत करण्याच्या या अनोख्या उपक्रमाचे कौतुक होत आहे.
हेही वाचा - महाराष्ट्रात २७६२ मतदान केंद्रे संवेदनशील! ९६७३ केंद्राचे होणार लाइव्ह वेबकास्ट
मतदान करण्याकरता कोणत्याही प्रकारची अडचण निर्माण झाल्यास १९५० या क्रमांकावर मदत मिळेल. शाळेतील विद्यार्थ्यांच्या पालकांकडून 10000 संकल्पपत्र भरून घेण्यात आली आहेत. 21 ऑक्टोबरला सर्व मतदार बंधू-भगिनींनी उत्स्फूर्तपणे मतदान करावे. भारतीय लोकशाही बळकट करावी, असे आवाहन जिल्हा निवडणूक निर्णय अधिकारी प्रकाश संकपाळ यांनी केले आहे.
