चंद्रपुरात उष्णतेची लाट; जगातील सर्वात उष्ण शहराच्या यादीत दुसऱ्या क्रमांकावर

उष्णतेसाठी परिचित असलेल्या चंद्रपूर शहरात या वर्षी देखील उन्हाची दाहकता जाणवायला लागली आहे. 30 मार्च रोजी जगातील सर्वात उष्ण शहरांपैकी चंद्रपूर शहर दुसऱ्या क्रमांकावर होते.

चंद्रपूर - उष्णतेसाठी परिचित असलेल्या चंद्रपूर शहरात या वर्षी देखील उन्हाची दाहकता जाणवायला लागली आहे. 30 मार्च रोजी जगातील सर्वात उष्ण शहरांपैकी चंद्रपूर शहर दुसऱ्या क्रमांकावर होते. यादिवशी 43.6 अंश सेल्सिअस इतक्या तापमानाची नोंद होती. आज देखील उन्हाचे चटके चांगलेच जाणवत होते. त्यामुळे दरवर्षीप्रमाणे या वर्षी देखील उन्हाच्या चटक्याचा त्रास चंद्रपुरकरांना सोसावा लागेल.

एप्रिल ते मे दरम्यान चंद्रपूर शहराचे तापमान शिगेला पोचते. या दरम्यानच्या काळात उन्हाचा पारा हा 48 डिग्री पार करतो. उष्ण तापमानाच्या शहरात जिल्ह्यात चंद्रपूर आणि ब्रम्हपुरी शहराचा समावेश होतो. या वर्षी देखील या शहरात उन्हाची दाहकता जाणवायला लागली आहे. काल चंद्रपूर शहराचे तापमान 43.6 अंश सेल्सिअस इतके होते. जागतिक तापमानाच्या आकडेवारीत चंद्रपूर हे दुसऱ्या स्थानावर होते, अशी माहिती पर्यावरण तज्ज्ञानी दिली. आज या तापमानाची नोंद 43.2 अशी करण्यात आली आहे. मात्र एप्रिल महिन्यात ही दाहकता वाढणार असल्याचे तज्ज्ञांचे मत आहे. यादरम्यान चंद्रपूर शहराचा पारा 48 अंश इतके जाण्याची शक्यता आहे. त्यामुळे चंद्रपुरकरांना केवळ कोरोनापासून नव्हे तर उन्हापासून देखील आपला बचाव करावा लागणार आहे. उन्हापासून बचाव करणारी अनेक पारंपरिक शितपेयांची दुकाने आता सुरू झाली आहेत. त्यावर बाहेर पडणाऱ्या नागरिकांची वर्दळ होताना दिसत आहे.