घुग्घुस नगरपालिकेचा मार्ग मोकळा, लवकरच अधिकृत घोषणा - पालकमंत्री

घुग्घुस शहराला नगरपालिकेचा दर्जा देण्याबाबत अधिसूचना शासनाने जारी केली आहे. याची येणाऱ्या दोन दिवसांत औपचारिकता पूर्ण होणार असल्याची माहिती चंद्रपूरचे पालकमंत्री विजय वडेट्टीवार यांनी दिली.

चंद्रपूर - घुग्घुस शहराला नगरपालिकेचा दर्जा मिळण्याचा मार्ग मोकळा झाला असून याची अधिसूचना शासनाने जारी केली आहे. याची येत्या दोन दिवसात औपचारिकता पूर्ण होणार असून अनेक वर्षांच्या संघर्षाला आता विराम लागणार आहे, असे पालकमंत्री विजय वडेट्टीवार यांनी आज (29 ऑगस्ट) स्पष्ट केले आहे.

घुग्घुस हे औद्योगिक शहर आहे. येथे वेकोलीची कोळसा खान तसेच सिमेंट, पोलाद आणि इतर अनेक कारखाने आहेत. त्यामुळे या शहराला नगरपालिकेचा दर्जा देण्याची मागणी गेल्या अनेक वर्षांपासून होत होती. यासाठी अनेक आंदोलने देखील झाली. मात्र, पुढे यावर काही होऊ शकले नाही. महाविकास आघाडीचे सरकार स्थापन होताच राज्याचे मदत व पुनर्वसन मंत्री तसेच जिल्ह्याचे पालकमंत्री विजय वडेट्टीवार यांनी घुग्घुस शहराला नगरपालिकेचा दर्जा मिळवून देऊ, असा शब्द दिला होता. त्यानुसार आता या प्रक्रियेला सुरुवात झाली आहे. या संदर्भात शासनाने अधिसूचना जारी केली असून येत्या दोन दिवसात याची औपचारिक घोषणा शासनाकडून केली जाईल, अशी माहिती आज वडेट्टीवारांनी प्रसार माध्यमासमोर दिली. वडेट्टीवारांचा मुनगंटीवारांना टोला

घुग्घुस नगरपालिकेच्या संदर्भात भाष्य करताना वडेट्टीवार यांनी माजी अर्थमंत्री सुधीर मुनगंटीवार यांना टोला लगावला. घुग्घुस नगरपालिकेच्या संदर्भात काहींनी याची घोषणा केली. त्यांचे मोठमोठे फलक लावण्यात आले, हारतुरे टाकून त्यांचा सत्कार करण्यात आला होता. मात्र, प्रत्यक्षात तसे काहीच झाले नाही. मात्र, आज या नगरपालिकेची अधिकृत घोषणा झाली आहे, असे म्हणत मुनगंटीवार यांचा उल्लेख न करता त्यांनी टोला लगावला.

हेही वाचा - गणेशोत्सव; कृत्रिम तलावांना नागरिकांचा उत्तम प्रतिसाद; पाच दिवसात ३,१४३ गणेशमूर्तींचे विसर्जन