चंद्रपूर : भारतीय जनता पक्षाचे अध्यक्ष जेपी नड्डा (BJP J P Nadda) आज महाराष्ट्र दौऱ्यावर आहेत. चंद्रपूर जिल्ह्यात त्यांनी जनतेला संबोधित करताना पंतप्रधान नरेंद्र मोदींच्या नेतृत्वाचे (PM Narendra Modi Leadership) कौतुक केले आहे. ते म्हणाले की, पंतप्रधान नरेन्द्र मोदी (PM Narendra Modi) यांच्या नेतृत्वात भारताने जगाला मागे टाकलं आहे. जगात प्रत्येक देश आव्हानांचा सामना करत असताना देखील पंतप्रधान देशाला सामोरे घेवून जात आहेत.
भारताची आर्थिक स्थिती मजबूत : दोनशे वर्षं देशावर राज्य करणारा ब्रिटन देश आर्थिक डबघाईस लागला आहे. मात्र, भारत ब्रिटनला मागे टाकत जगातील पाचव्या क्रमांकाची अर्थव्यवस्था झाली आहे. अमेरिका, रशिया आर्थिक मंदीचा सामना करीत आहे, अशा स्थितीत मोदींमुळे देशाची आर्थिक स्थिती ही संतुलित आहे. असेही ते म्हणाले. पूर्वी 52 टक्के मोबाइल हे भारताला आयात करावे लागत होते आता जगातील 97 टक्के मोबाईलचे उत्पादन हे भारतात केले जाते. रसायन आणि औषध आणि पोलाद क्षेत्रात भारत जगात अव्वल आहे. जेव्हा जगाची अर्थव्यवस्था डळमळीत होत आहे अशावेळी भारताची आर्थिक स्थिती मजबूत आहे, असा दावा त्यांनी केला.
मास्क न लावता फिरतोय : आज उपस्थित जनसमुदायापैकी कोणीही मास्क लावलेला नाही. सगळे निवांत एकमेकांजवळ दाटीवाटीने बसलेले आहेत. अमेरिकेने अद्याप कोरोनाने लसीकरण पूर्ण केलेले नाही. युरोपचेही तसेच चीन कोरोनाशी कसा झुंज देतो आहे हेही आपण बघतोय. तर इकडे मोदींजींच्या नेतृत्वात भारतात 220 कोटी लसी देण्यात आल्या. यात डबल डोझ, बूस्टर डोझचा समावेश आहे. जर तुम्हाला प्रकाश माहिती असेल तर अंधारही तुम्हाला माहिती हवा. जग जेव्हा समस्यांच्या अंधारात होतं त्यावेळी आपण काय करत होतो आणि किती सुरक्षित होतो याची जाणीव होणे गरजेचे आहे, असेही ते यावेळी म्हणाले.
काँग्रेसवर टीकास्त्र : मुर्ख काँग्रेसच्या राज्यात टीबीची लस देशात येण्यास 25 वर्षे लागली, पोलिओ 28 वर्षांनी, जापनीज मेंदूज्वरची लस देण्यास तब्बल 100 वर्षे लागली. तर मोदींच्या नेतृत्वात अवघ्या नऊ महिन्यात कोरोनाची लस तयार झाली, 100 देशांना ती देण्यात आली यापैकी 48 देशांत ते मोफत पाठविण्यात आली. असेही ते म्हणाले.
मोदींनी युक्रेन-रशिया युद्ध थांबवले : जे अमेरिका, युरोप करू शकले नाही ते मोदींच्या नेतृत्वात भारताने करून दाखवले. युक्रेन-रशियाचे युद्ध सुरू असताना मोदींनी दोन्ही देशांच्या राष्ट्राध्यक्षांना फोन करून युद्ध थांबवले आणि 32 हजार भारतीय विद्यार्थ्यांना सुरक्षित मायदेशी परत आणले असाही दावा नड्डा यांनी केला.
उद्धव ठाकरेंनी पाठीत खंजीर खुपसला : मुख्यमंत्री पदाच्या लालसेने उद्धव ठाकरे यांनी पाठीत खंजीर खुपसला आणि विपरीत विचारांच्या पक्षाशी हातमिळवणी करत महाविकास आघाडी स्थापन केली. तीन तीन पक्षांकडे डोकं टेकवावे लागत होते तेव्हा कामे होत होती, असा आरोपही त्यांनी केला.
मिशन 144 चा बिगुल चंद्रपुरातून : लोकसभा निवडणुकीत देशात 144 ठिकाणी भाजपला पराभव पत्करावा लागला. या ठिकाणी भाजप पुनः निवडून येण्यासाठी भाजपने रणनीती आखली असून याची सुरुवात आज चंद्रपूर लोकसभा मतदार केंद्रातून करण्यात आली. भाजप अध्यक्ष जे. पी. नड्डा यांनी या प्रवास दौऱ्याचा बिगुल फुंकला. यावेळी वनमंत्री तसेच जिल्ह्याचे पालकमंत्री सुधीर मुनगंटीवार, भाजपा प्रदेशाध्यक्ष चंद्रशेखर बावनकुळे, राष्ट्रीय मागासवर्गीय आयोगाचे अध्यक्ष तसेच माजी केंद्रीयमंत्री हंसराज अहिर, खासदार अशोक नेते, खासदार रामदास तडस, आमदार संजीव रेड्डी, आमदार संदीप धुर्वे, आमदार डॉ. रामदास आंबटकर व आमदार बंटी भंगाडीया हे उपस्थित होते.
