बुलडाणा - खामगाव तालुक्यातील टेंभुर्णा येथील १० वीत शिकणाऱ्या १६ वर्षीय विद्यार्थिनीने राहत्या घरात शुक्रवारी गळफास घेऊन आत्महत्या केल्याची घटना घडली आहे. प्रगती शेषराव मोरे असे विद्यार्थिनीचे नाव आहे. शुक्रवारी विज्ञान विषयाचा पेपर अवघड गेल्याने तिने हे पाऊल उचलल्याचे समोर आले आहे. खामगाव ग्रामीण पोलिसांनी घटनेचा पंचनामा करून नोंद घेतली आहे.
प्रगती ही इयत्ता १० वीमध्ये जागृती विद्यालयात शिकत होती. शुक्रवारी तिचा विज्ञान विषयाचा पेपर होता. मात्र, पेपर संपवून घरी आल्यावर तिने राहत्या घराच्या छताला असलेल्या लोखंडी अँगलला ओढणीने गळफास घेतला. आत्महत्या करण्यापूर्वी तिने स्वतःच्या हातावर आपण पेपर अवघड गेल्याने आत्महत्या करत आहोत, असे लिहून ठेवले होते. पोलिसांनी या घटनेचा पंचनामा केला आहे. पेपर अवघड गेल्याने आत्महत्या करू नका, भविष्यात अजूनही पर्याय उपलब्ध आहेत, असे आवाहन पोलिसांनी केले आहे.
