बुलडाणा - जिल्ह्यात गेल्या ३-४ वर्षांपासून अत्यल्प पाऊस झाला आहे. यामुळे संपूर्ण जिल्हाभरातच चारा आणि पाण्याचा मोठा प्रश्न निर्माण झाला आहे. यामुळे चाऱ्याचे भावही गगनाला भिडले आहेत. परिणामी शेतकऱ्यांवर जीवापाड जपलेली जणावरे अक्षरशः विकण्याची वेळ आली आहे. त्यामुळे गुरांचा बाजार भर उन्हाळ्यात गच्च भरलेला दिसत असून पशुपालकांना आपली जनावरे कवडीमोल भावाने विकावी लागत आहेत.
माणसांचीच पिण्याच्या पाण्यासाठी पायपीट होत असताना जनावरांना पाणी आणि चारा कुठून द्यावा, असा प्रश्न पशुपालक शेतकऱ्यांसमोर उभा ठाकला आहे. जिल्ह्यातील अनेक लघु प्रकल्प कोरडे पडले असून अनेक गावांच्या पाणीपुरवठा योजना प्रभावित झाल्या आहेत. त्यामुळे सर्वत्र पाणीटंचाई निर्माण झाली आहे. पाणीटंचाईसोबत चाराटंचाईनेसुध्दा आपले डोके वर काढले असून चाऱ्याचे भाव गगनाला भिडले आहे.
बुलडाणा जिल्ह्यात एकूण १० लाख ७२ हजार ९३७, असे लहान मोठे पशुधन आहे. त्यासाठी दररोज १४ हजार १४ मेट्रीक टन चारा लागतो. मात्र, येथे केवळ निम्मा चाराच उपल्बध आहे. सध्यस्थितीत कडब्याच्या एका पेंडीचा भाव २५ ते ३० रुपये झाले आहे. एका जनावरास दिवसभरात कमीत कमी ४ ते ५ पेंड्या लागतात. त्यामुळे जनावरांचे पोट कसे भरावे या विवंचनेत पशुमालक सापडले आहेत. जिल्ह्यात भीषण चाराटंचाई असतानादेखील प्रशासनाने आतापर्यंत जिल्ह्यात एकही चारा छावणी सुरू केली नाही. त्यामुळे नाईलाजास्तव पशुमालकांना आपली जनावरे बाजारात मातीमोल भावाने विक्री करावी लागत आहे. त्यामुळे पशू मालकांची हेळसांड होत असून ती थांबविण्यासाठी चारा छावणी सुरू करण्यात यावी, अशी मागणी पशुमालक व शेतकरी करीत आहेत.
