बुलडाणा - विविध प्रलंबित मागण्यांसाठी युनायटेड फोरम ऑफ बँक युनियनच्या नेतृत्वात राष्ट्रीयकृत बँक कर्मचाऱ्यांनी संप केला. बँक कर्मचाऱ्यांच्या वतीने शनिवारी जिल्हाधिकारी कार्यालयावर मोर्चा काढण्यात आला. मोर्चातील शिष्टमंडळाच्या वतीने जिल्हाधिकाऱ्यांना मागण्यांचे निवेदन देण्यात आले.
नोव्हेंबर २०१७ पासून प्रलंबित वेतन वाढ लागू करून बँक कर्मचाऱ्यांना किमान वीस टक्के पगार वाढ देण्यात यावी, पाच दिवसांचा आठवडा करावा, नवीन पेन्शन योजना बंद करून जुनी पेन्शन योजना लागू करावी, फॅमिली पेन्शनमध्ये वाढ करावी, अधिकाऱ्यांच्या कामाचे तास निश्चित करण्यात यावे या मागण्यांसाठी हा संप करण्यात आला.
हेही वाचा - शेतकर्यांचा अपेक्षाभंग करणारा अर्थसंकल्प; सहकारमंत्र्यांची प्रतिक्रिया
बुलडाणा येथील स्टेट बँकेच्या मुख्य शाखेपासून जिल्हाधिकारी कार्यालयापर्यंत मोर्चा काढण्यात आला. यावेळी विविध घोषणा देऊन बँक कर्मचाऱ्यांनी परिसर दणाणून सोडला. स्टेट बँक युनियनचे क्षेत्रीय सचिव अविनाश बोचरे, स्टेट बँक अधिकारी संघटनेचे सिद्धार्थ पवार, सारंग संघवे, बँक ऑफ इंडियाचे आशिष टेकाडे, लिखिते, रामेश्वर जुनारे, आशिष वाढोकर, शंकर पोपटानी, संजय निंबोळकर, रोहन जिंतूरकर, शशी वखरे, राजेश कुलकर्णी, कपिल परिहार, महेश पाटील, दिगंबर तिवने, अनिल कुलकर्णी, अदिती सांगवी, राहुल वर्मा, शीतल बोरसे, अविनाश वर्मा यांच्यासह जिल्ह्यातील सर्व बँक कर्मचाऱ्यांनी सहभाग घेतला.
