बुलडाणा - कोरोना लॉकडाऊनच्या काळात जीवाची पर्वा न करता पोलीस दल प्रामाणिकपणे कर्तव्य बजावत आहे. या अत्यावश्यक सेवेतील पोलीस विभागाच्या अधिकारी-कर्मचाऱ्यांना शाबासकी देण्याची वेळ असताना दसरखेळ पोलीस ठाण्याच्या 55 वर्षीय पोलीस हेड कॉन्स्टेबल रवींद्र पोळ यांना चक्क कारवाईला सामोरे जावे लागले आहे. निमित्त होते राज्याचे गृहमंत्री अनिल देशमुख यांच्या खासगी सचिवाला वाहतूक पास नसल्याने अडवल्याचे.
पोलीस हेड कॉन्स्टेबल रवींद्र पोळ यांना कर्तव्यावरून पोलीस मुख्यालयात परत बोलावले असून त्यांची चौकशीचे करण्याचे आदेश जिल्हा पोलीस अधीक्षक डॉ.दिलीप भुजबळ-पाटील यांनी दिले आहेत. या घटनेमुळे पोलीस विभागात खळबळ उडाली आहे. ही कारवाई कोणाच्या तक्रारीवरून करण्यात आली आहे, याबाबत वरिष्ठ अधिकारी बोलण्यास नकार देत आहेत.
बुलडाण्याच्या मलकापूर एमआयडीसीजवळील दसरखेड पोलीस ठाण्यामध्ये हेड कॉन्स्टेबल रवींद्र पोळ कार्यरत आहेत. रविवारी २९ मार्चला राष्ट्रीय महामार्ग क्रमांक सहावर आंतरजिल्हा सीमावर्ती चेकपोस्टवर ते तैनात होते. त्यावेळी राज्याचे गृहमंत्री अनिल देशमुख यांचे खासगी सचिव वैभव तुमाने हे नागपूरवरून मुंबईला गाडीने जात होते. त्यांच्या वाहनाला नंबरप्लेट नसल्याने पोळ यांना त्यांना चौकशीसाठी थांबवले. गृहमंत्री अनिल देशमुख यांचा खासगी सचिव असल्याचे तुमाने यांनी पोळ यांना सांगितले.
त्यानंतर वैभव तुमानेने पोळ यांचे गृहमंत्र्यांसोबत मोबाईलद्वारे बोलणे करून दिले. यावेळी अनिल देशमुख यांनी पोलीस कर्मचारी पोळ यांना मध्यरात्री प्रामाणिकपणाने कर्तव्य करत असल्यासाठी शाबासकी दिली. कर्तव्यावर असताना त्यांना मिळत असलेल्या जेवणाबाबतही आपुलकीने विचारपूस केली. सदर व्यक्ती खरोखर गृहमंत्री अनिल देशमुख यांचे खासगी सचिव असल्याची खात्री केल्यानंतर सचिव तुमाने यांना पुढे जाण्यास परवानगी दिली. प्रामाणिकपणे कर्तव्य करण्यासाठी रवींद्र पोळ यांना शाबासकी देण्याऐवजी पोलीस अधीक्षकांनी कारवाई केली आहे.
आत्ताचे गृहमंत्री देशमुख हे आर. आर. पाटलांसारखे -
प्रामाणिकपणे कर्तव्य करणाऱ्या रवींद्र पोळ यांना कारवाईला समोरे जावे लागले. मात्र, तरीही त्यांनी राज्याचे गृहमंत्री अनिल देशमुख हे माजी गृहमंत्री आर. आर. पाटील यांच्यासारखेच असल्याची प्रतिक्रिया दिली. त्यांनी प्रामाणिकपणाने कर्तव्य करत असल्यासाठी शाबासकी देवून माझ्या कुटुंबाची आणि जेवणाची आपुलकीने विचारपूस केली, अशी प्रतिक्रिया रवींद्र पोळ यांनी दिली.
